Тăван чăваш чĕлхине сыхласа хăварас тата аталантарас тĕллевпе Пушкăртстан Республикипе Пелепей районĕнче пысăк масштаблă наципе культура пулăмĕсем иртеççĕ. Çав шутра - çулсеренех йĕркелекен «Чăваш чĕлхи кунĕ», «Акатуй» (Сабантуй), «Иванов вулавĕсем» республика шайĕпе иртекен наукăпа практика конференцийĕ, «Силпи асамачĕ» регионсем шайĕнчи ачасемпе çамрăксен фестивалĕ тата ыттисем те. Пелепей районĕнче тăван чĕлхене сыхласа хăварассине пысăк тимлĕх уйăракан республикăри пĕртен-пĕр чăваш гимназийĕ ĕçлет.
Пелепей хулипе районĕнчи чăвашсен наципе культура автономийĕ укçа-тенкĕпе çыхăнман организацисем Пушкăртстан Республикин грантне çĕнсе илессипе çыхăннă конкурса «Еткер медиацентр» проект тăратать. Ăна 2024 çулта Пушкăртстан Республикинчи патшалăх тата тăван чĕлхесене упраса хăварас тĕллевпе субсиди евĕр параççĕ.
«Еткер медиацентр» чăваш чĕлхине упрама тата аталантарма пулăшĕ. Вăл пирĕн хулапа районти, республикăри чăвашсемпе ытти халăхсене пĕрлештерекен пĕртен-пĕр инфомаци хăтлăхĕ пулĕ. Çĕнĕ майсем пулăшнипе эпир вырăс тата чăваш чĕлхисемпе хыпарсем пĕлтерĕпĕр. Медиацентр кирек мĕнле кăткăс проектсене те пурнăçа кĕртĕ. Эпир анлă спектра ярса илĕпĕр, видеороликсемпе передачăсем, документлă фильмсем ÿкрессинчен пуçласа пысăк трансляцисем ирттересси таран.