«Урал сассине» килĕштеретпĕр, вулатпăр, çырăнса илетпĕр»

Хăйне евĕр уяв программине Пушкăртстанăн тата Чăваш Енĕн тава тивĕçлĕ культура ĕçченĕ Галина Кириллова вĕрентекен ертсе пыракан ачасен ушкăнĕ уçрĕ. «Урал сассине» сумласа çырнă сăвă йĕркисене вуланă хыççăн сăмах хаçатăн тĕп редакторне Юрий Михайлова пачĕç. Юрий Николаевич пичет кăларăмĕ агитатор, пропагандист тата йĕркелÿçĕ тивĕçĕсене пурнăçланине аса илтернĕ май, унăн аталану çулĕпе паллаштарчĕ. Вăл малтанхи сакăр номер обществăлла редколлеги вăйĕпе Авăркас, Пишпÿлек, Пелепей тăрăхĕсенче тухни çинче чарăнса тăчĕ, çав номерсене тĕлпулăва пухăннисене кăтартса иртнĕ кунсене аса илтерчĕ, сумлă шур сухалсен ячĕсене - Алексей Кондратьев профессора, Иван Тарасовпа Николай Леонтьев журналистсене, Александр Федоров вăрçă ветеранне, Савген Саватнеев депутата, Александр Савельев-САС çыравçа тата ыттисене те – палăртса хăварчĕ.
- Вĕсем пуçарнă пархатарлă ĕçе эпир, сыввисем, паянхи кун малалла тăсатпăр. Çавăнпа та «Урал сасси» тĕп редакторпа коллективăн хаçачĕ çеç мар, Пушкăртстан чăвашĕсен пуянлăхĕ пулса тăрать, - çирĕплетрĕ Юрий Михайлов.
Паллах, кăларăм ертÿçи паянхи лару-тăрупа паллаштарчĕ. Интернет ĕмĕрĕнче хаçатăн сайчĕпе социаллă сечĕсем пурри хальхи вăхăтра пĕлтерĕшлĕ пулнине асăрхаттарчĕ. Çавăн пекех залра ларакансенчен те ыйтусем пулчĕç, вĕсем çине те Юрий Николаевич тулли хурав пама тăрăшрĕ.
Малалла вулакансем сăмах илчĕç. Вырсарни шкулĕн директорĕ Наталья Никитина «Урал сасси» коллективне юбилей ячĕпе саламланă май, хаçатпа чылай çул çыхăну тытнине, ăна çитес çул валли хăйсен коллективĕпех çырăнса илме кăмăл тунине пĕлтерчĕ.
Пушкăртстанри чăвашсен Канашĕн ертÿçи Ирина Сухарева республикăри чăваш кăларăмĕ хăй умĕнче тăракан тĕллевсене тухăçлă пурнăçланине, обществăшăн вăл кирлĕ пулнине палăртрĕ, хаçат ĕçченĕсене ăнăçу сунчĕ.
Владимир ЯКОВЛЕВ.
Ĕпхÿ хули.
Редакцирен: Çак тĕлпулу вăхăтĕнчех чăваш хастарĕсем ноябрь уйăхĕн 23-мĕшĕнче Кармаскалă районĕнче республика шайĕнче «Кĕр сăри» йăла уявĕ иртессипе çыхăннă ыйтусене йышпа пăхса тухрĕç. Унта тĕрлĕ район-хуласенчи фольклор ушкăнĕсем хутшăнĕç. Завкăсене ноябрь уйăхĕн 15-мĕшĕччен [email protected] электронлă адреспа йышăнаççĕ. Ыйтса пĕлмелли телефон – 8-927-637-23-57.