Хаçата çырăн та парнеллĕ пул

Пирĕн редакцишĕн кашни çур çулта çырăнтару кампанийĕ иртнĕ хыççăн лотерея вылявĕ йĕркелесси ырă йăлана кĕчĕ. Çакă, паллах, вулакансене те хавхалантарать, пире те, «Урал сасси» хаçат ĕçченĕсене, вĕсемпе çывăхрах паллашма май туса парать. Мĕншĕн тесен хаçат тусĕсемпе, командировкăсенче пулнă май, куçа-куçăн тĕл пулса калаçатпăр, лотерейăпа выляса илнĕ парнесене парса хăваратпăр.

Нумаях пулмасть Шаран районĕнчи Хурамал ялне килсе çитрĕмĕр. Çак ялта «Урал сассине» 2024 çулшăн çырăнса икĕ çын парнесене тивĕçнĕччĕ. Вĕсем – ялти ача садĕнче ĕçлекен Светлана Григорьева воспитательпе 83 çулхи ĕç ветеранĕ Аркадий Яковлев (вĕсем сăн ÿкерчĕкре). Хаçат тусĕсене пысăках мар парнесене алăран тыттарса саламларăмăр. Аркадий Андреевич эпир килнĕ майпа усă курса «Урал сассине» çитес 2025 çулшăн та çырăнса илме кăмăл турĕ, вĕри кофепе сăйларĕ.
Сăмах май, чăваш кăларăмне çитес çулшăн çырăннă вулакансем хушшинче январь уйăхĕнче черетлĕ лотерея вылявĕ иртет. Çавăнпа та, хаклă туссем, сиртен хаçата çырăннине çирĕплетекен квитанцисене кĕтетпĕр. Эсир вĕсене конверт ăшне чиксе почта урлă, редакцин электронлă адресĕпе [email protected] тата 8 963 146 44 44 номерпе ватсапа ярса пама пултаратăр.
Кашни çур çултах «Урал сассин» лотерея вылявне 150 ытла çын хутшăнать. Апла пулсан, хисеплĕ вулакансем, хăвăрăн телей шăпине тĕрĕслесе пăхма васкăр. Сире пурсăра та ăнăçу сунатпăр.
«Урал сасси» хаçат редакцийĕ.