Çĕр ĕçченĕсен ĕçĕ çăмăл мар, анчах хисепре

Пушкăртстан Республикин пысăк наградине – «Ĕçри хастарлăхшăн» медале Авăркас районĕнчи «Дружба» СПК тракторисчĕ Александр Васильев (Шланлă ялĕ, пĕрремĕш сăн ÿкерчĕкре) тивĕçнĕ.
«Пысăк çитĕнÿсем тунăшăн тата хăй профессине чунтан парăннăшăн Авăркас тăрăхĕнчи «Дружба» ял хуçалăх кооперативĕн уй-хирĕсенче хĕрĕх ытла çул ĕçлекен Александр Валерьевич Васильева палăртас килет. Вăл яланах пур çĕртре те малти ретре, темиçе теçетке çамрăк механизатор хатĕрленĕ», – палăртнă хăй сăмахĕнче ПР Пуçлăхĕ Радий Хабиров.
Çавăн пекех Пушкăртстан Республикин Правительствин вице-премьерĕ – ял хуçалăх министрĕ Ильшат Фазрахманов икĕ ял хуçалăх предприяти ертÿçисене – Авăркас районĕнчи «Мичурин» тулли мар яваплăхлă обществăн директорне Александр Анатольевич Александрова (Меселпуç ялĕ, иккĕмĕш сăн ÿкерчĕк) тата Пишпÿлек районĕнчи Киров ячĕллĕ ял хуçалăх предприятийĕн председательне Александр Маркелович Тихонова (Ситекпуç ялĕ, виççĕмĕш сăн ÿкерчĕк) – «Пушкăртстан Республикин тава тивĕçлĕ ял хуçалăх ĕçченĕ» хисеплĕ ята парса чысланă.
Хăйсен пурнăçĕсене çĕр ĕçне халалланă ял хуçалăх ĕçченĕсене сумлă наградăсене тивĕçнĕ ятпа саламласа çирĕп сывлăх, тăнăçлăхпа ырлăх сунатпăр. Сирĕн ĕçĕр пĕрре те çăмăл мар, анчах яланах хисепре. Эсир пире лайăх пахалăхлă ял хуçалăх таварĕсемпе тата апат-çимĕçпе тивĕçтерсе тăратăр, шăпах сирĕн канăçсăр та ырми-канми ĕçĕре пула пирĕн сĕтел çинче яланах çемçе те техĕмлĕ çăкăр хуçаланать. Çăкăртан асли çук, ял хуçалăхĕ вара – экономика никĕсĕ. Тайма пуç сире!
Надежда РОДИОНОВА.