Чăваш Хурамалĕнчи палăк виçĕ ĕмĕр историне çавăрса илнĕ

Палăка уçассипе çыхăннă церемоние Авăркас район администраци пуçлăхĕн çумĕ Айгуль Шакирова, Чăваш Хурамал ял Канашĕн пуçлăхĕ Николай Ефремов, район Канашĕн депутачĕ Виталий Тарасов, çар комиссарĕн çумĕ Рустам Дильмухаметов, районти ветерансен Канашĕн ертÿçи Риф Рафиков, Мударис Сафин таврапĕлÿçĕ, вырăнти хастарсем, ял çыннисемпе унăн хăнисем хутшăнчĕç.
Чăваш Хурамал ялĕнчи мемориал пысăк. Вăл 1100 çын ятне ĕмĕр-ĕмĕрех асра хăварĕ. Унăн тĕп уйрăмлăхĕ вара çакăнта, пуç хунисен списокĕ 1780 çултан пуçланать. Çакă ял çыннисен паттăрлăхĕпе хăюлăхĕн историйĕ вăрăм пулнине палăртать.
– Асăннă списока вырăс çĕрĕн тăшманĕсене (турккăсем, французсем, акăлчансем, яппунсем, австро-германецсем, чехословаксем, поляксем, басмачсем, финнсем, румынсем, мадьярсем, итальянецсем, бандерсем тата ытти нумай-нумай халăхсем, паянхи кунчченех) хирĕç кĕрешекенсем кĕнĕ. Темĕн пысăкăш вăхăта çавăрса илни палăка хăйне евĕрлĕ тăвать, мĕншĕн тесен çĕршыври урăх нихăш вырăнта та ун чухлĕ вăхăта çавăрса илекен пĕр палăк та çук, – терĕ асăну композицишĕн яваплă Мударис Харисович.
Официаллă çынсем хăтлăх объектне хăпартас ĕçе хастар хутшăннă ял çыннисене Хисеп хучĕсемпе Тав çырăвĕсем парса палăртнă. Чăваш Хурамал шкул педагогĕсемпе вĕренекенĕсем паллă пулăма халалласа патриотизмла юрăсем юрланă. Кашни сăмах калаканах паянхи вăхăтри геройсем (ял Канашĕнчен ятарлă çар операцине 17 çын хутшăннă) часах каялла таврăнасса, вĕсен ячĕсем комплексри «Вĕсем çĕнтерÿпе таврăнчĕç» пая илемлетессе шанса калаçрĕç.
Данил АНДРЕЕВ.
Авăркас районĕ,
Чăваш Хурамал ялĕ.