Пур хыпар та
Çырăнтару
19 Ноябрӗн 2024, 12:05

Петровкăсем ял илемлĕрех пуласса шанаççĕ

Октябрь уйăхĕн 30-мĕшĕнче Пишпÿлек районĕнчи Хушăлка ял хутлăхне кĕрекен Петровка ял çыннисем тĕрлĕ ыйтусене сÿтсе явма пуçтарăнчĕç. Пухăва Хушăлка ял хутлăх администрацийĕн пуçлăхĕ Виктор Тимофеев, администраци специалисчĕсем Клара Семеновапа Лилия Егорова хутшăнчĕç.

Петровкăсем ял илемлĕрех пуласса шанаççĕ
Петровкăсем ял илемлĕрех пуласса шанаççĕ

Пуçтарăннисем çу кунĕсенче туса ирттернĕ ĕçсем пирки доклад итлерĕç, хальхи вăхăтра халăх умĕнче тăракан тĕрлĕ ыйтусене сÿтсе яврĕç. Калаçнă хушăра ытти ыйтусем те сиксе тухрĕç, анчах вĕсене ял çыннисен вăйĕпе çеç пурнăçа кĕртме май çук. Ыйтăва татса пама Вырăнти пуçарусене пулăшса пыракан программа (ППМИ-25) пулăшассине шанса унта хутшăнма йышăну турĕç, пĕр шухăшлă пулса сасăларĕç.
Ноябрь уйăхĕн 13-мĕшĕнче ял çыннисем тепĕр пуху ирттерчĕç. Ку хутĕнче те канашлăва ял хутлăх администрацийĕн ĕçченĕсем хутшăнчĕç. Пуçтарăннисене виçĕ тĕрлĕ проект сĕнчĕç. Пĕрремĕшĕ – Петровка ялĕнчи тĕп урама юсасси, иккĕмĕшĕ – Тăван çĕршывăн Аслă вăрçин паттăрĕсене халалланă палăка çĕнетесси тата ун таврашĕнчи территорие хăтлăх кĕртесси, виççĕмĕшĕ – ту айĕнчи çăл территорине тирпейлесси.
Ял çыннисем ытларах çула юсассин кирлĕлĕхĕ пирки каларĕç. Ку ахальтен мар. Çул çинчи хăш-пĕр путăксем тем тарăнăш, кĕркуннепе çуркунне яла кĕрсе тухасси уйрăмах хĕн. Çакă машинăсемпе мотоциклсене, велосипедсене ватасран çеç мар, ÿксе аманасран та хăрушă. Унсăр пуçне ялта ватă çынсем те, инвалид ачасем те пур. Вĕсене вара пĕрмаях тухтăр пулăшăвĕ кирлĕ пулма пултарать. Хăш проекта суйласа илесси ялта пурăнакансем хушшинче анкета сасăлавĕ ирттернĕ хыççăн паллă пулĕ.
Çавăн пекех пуху вăхăтĕнче пуçарулăх ушкăнне те суйларĕç. Унта ялти хастар çынсем кĕчĕç.
Вырăнти пуçарусене пулăшса пыракан программа (ППМИ-25) пирĕн яла илемлĕрех, хăтлăрах, ял çыннисене телейлĕрех тума пулăшасса шанатпăр.
Наталья КОВАЛЬЦОВА.
Пишпÿлек районĕ, Петровка ялĕ.

Петровкăсем ял илемлĕрех пуласса шанаççĕ
Петровкăсем ял илемлĕрех пуласса шанаççĕ
Петровкăсем ял илемлĕрех пуласса шанаççĕ
Петровкăсем ял илемлĕрех пуласса шанаççĕ
Автор:Надежда Родионова 
Читайте нас: