Сывлăх беседки ялăн капăрлăхĕ пулса тăнă

Мускаври ÿкерÿ ушкăнĕ çулталăк хушши Туртÿллĕ ялĕнче ĕçленĕ: вырăнта пурăнакансен пурнăçне тĕпченĕ, «Урă ял» конкурс шайĕнчи мĕнпур мероприятие хутшăннă. Сăмах май, Тÿртÿллĕ ялĕ республика конкурсĕнче тăваттăмĕш вырăн йышăннă.
Ӳкерÿ ушкăнĕн коллективĕ вырăнта пурăнакансем урă пурнăç йĕркин тĕп тĕллевĕсене тăрăшса пурнăçа кĕртнине хăйсен куçĕсемпе курнă, тивĕçлипе хак панă. Çакна шута илсе Мускав çыннисем строительство материалĕсем парнеленĕ. Ялăн активлă та ĕçчен çыннисем вара пĕтĕмĕшле вăйпа илемлĕ беседка туса лартнă.
Сывлăх беседкине уçассипе çыхăннă церемони Пĕлÿ кунĕнче иртнĕ. Педагогсемпе вĕренекенсем тата вĕсен ашшĕ-амăшĕсем хăйсен савăнăçне пытарман. Мероприяти хăнисен шутĕнче «Шаран районĕнчи Граждансене хÿтĕлев паракан управлени» ертÿçи Ильнур Зилеев тата районти вĕрентÿ пайĕн методисчĕ Алевтина Хабибуллина пулнă. Хăйăва Тÿртÿллĕри вăтам шкулта ăс пухакан Камилла Тихоновапа Разалия Мальканова (4 класс) тата Ярослава Тихонова (2 класс) каснă. Шăпах вĕсем «Урă ял – 2024» республика конкурсĕн муниципалитет тапхăрĕнчи мероприятисене хастар хутшăннă.
Ял çыннисем тăван яла илем кÿрекен беседкăна пуçтарса лартнă арçынсене чунтан тав тунă. Вĕсем – Юрий Трофимов, Александр Георгиев, Геннадий Михайлов, Илья Кузнецов, Кирилл Леонтьев. Разифа Никифоровапа Лилия Трофимова тата Марина ăна сăрласа илемлетнĕ.
– Пирĕн хамăрăн пĕчĕк Тăван çĕршывăмăра илемлĕрех тăвас тесен кашни кун тăрăшмалла. Беседка ялăн капăрлăхĕ пулса тăчĕ, пăхсан – куç савăнать, ун çумĕпе иртнĕ май ларса канас килет. Унпа вăрах вăхăт хушши усă курмалла пултăр, вăл çитĕнекен ăрăва та савăнтартăр. Ентешĕмĕрсем, пирĕн беседкăна упраса хăвармалла. Ăна пире чунтан тăрăшнăшăн тата тăван кĕтесе юратнăшăн парнеленĕ, - тенĕ Туртÿллĕ ялĕнчи модельлĕ вулавăш ĕçченĕ Разифа Никифорова массăллă мероприятисемпе проектсен хастар участникĕ.
– Тÿртÿллĕ ял хутлăхĕнче пурăнакансем «Атайсал», «Урă ял», «Чăн ĕçсем» проектсене активлă хутшăнаççĕ. Асăннă проектсен витĕмĕпе эпир яла илемлетме пултартăмăр, çулсем турăмăр, арт-объектсем вырнаçтартăмăр, картишсем патне хывнă шыв пăрăхĕсен системине лайăхлатрăмăр, çуртсене газ пăрăхĕсемпе çыхăнтартăмăр. Хальхинче Тÿртÿллĕ çыннисем беседкăллă пулчĕç, çакă вĕсен тивĕçĕ.
Кăçал Тÿртÿллĕ ялĕ «Урă ял – 2024» республика конкурсĕнче 300 пин тенкĕлĕх грант çĕнсе илчĕ. Асăннă укçа-тенкĕпе ача-пăча вылямалли комплекс туянтăмăр. Вырăнта пурăнакансене патриотизмшăн, хастар пулнăшăн чунтан тав тăватăп! – тесе сăмах каланă Тÿртÿллĕ ял Канашĕн пуçлăхĕ Ляйсан Гибатова.
Ирида МАТНИЯЗОВА.
Шаран районĕ,
Туртÿллĕ ялĕ.