Шăнкăравран пуçласа маскировка сечĕ таранах: Наталья Соколова канăç хуралĕнче

Иглин районне кĕрекен Чăваш Кăпавĕ ялĕнчи П.И.Пономарев ячĕллĕ вăтам шкулта вӑтӑр ҫул тăршшĕ пуҫламӑш класс ачисене вĕрентнĕ Наталья Ильинична Соколова тивĕçлĕ канăва тухнă хыççăн волонтер ĕçне кÿлĕннĕ, анчах хӑйӗн тӗп принципне – ҫывӑх ҫынсемшĕн тӑрӑшассине – кирек хăçан та шанчăклă пулса юлать.

Наталья Ильиничнăна Чăваш Кăпавĕнче пурӑнакан кашни ҫынах пӗлет, паллать, хисеплет. Пӗлӳ тӗнчине пӗрремӗш утӑмсем туса юратнă вĕрентекенĕмĕрĕн класс алăкĕ урлă пин-пин ача каçнă. Унӑн урокӗсем правилӑсене вӗренни кӑна мар, пултарулӑхпа ырӑлӑх тӗнчине илсе каякан чӑн-чӑн ҫул ҫӳрев пулнӑ. Вӑл кашни ачан чĕри патне çул тупма, унра вĕренÿ туртăмне аталантарма пӗлетчĕ.
– Ачасемпе ӗҫлесси – питӗ пысӑк яваплӑх. Вĕсем шӑпах пуҫламӑш шкулта пурнăç никĕсне хываҫҫӗ-ҫке. Çавăнпа та эпĕ ачасене вулама-ҫырма вӗрентнисӗр пуҫне вӗсенче хӗрхенӳ, Тӑван ҫӗршыва юратас туйӑмсене аталантарма тӑрӑшнӑ, – хăйĕн шухăшне пĕлтерет Наталья Ильинична.
Тивӗҫлӗ канӑва тухсан Наталья Ильинична ҫӗршывра пулса иртекен пулӑмсенчен айккинче тӑрса юлайман. Вӑл волонтерсен штабне ҫитнӗ, унта унӑн опычӗ тата алӑпа ӗҫлеме пӗлни кирлĕ пулнӑ.
– Маскировка сечӗсем ҫыхасси тата дронран хÿтĕленме пулăшакан утиялсем тӑвасси ҫӑмӑл ӗҫ мар, вӑл чӑтӑмлӑхпа тимлӗх ыйтать, – каласа парать штаб волонтерӗ Людмила Спиридонова. – Анчах Наталья Ильинична ҫав тери тӑрӑшса ӗҫлет, тӗлӗнмеллипех тӗлӗнетӗн. Тата вӑл яланах хӑйӗн ырӑ кӑмӑлӗпе савăнтарать, пире пурне те пулӑшса пырать.
Наталья Ильинична хăй ырă ĕç тунипе мухтанмасть.
– Санӑн аллусем усӑ кӳме пултарни, пирӗн тетелсем малти линире ачасене хÿтӗлени вӑй-хӑват, шанӑҫ парать. Ман шутпа, пиртен кашнинех ҫӗнтерӗве тÿпе хывмалла, – тет вӑл.
Наталья Ильинична çĕнĕ ĕçе алла илсе обществӑна усă кÿме пултарнин тӗслӗхӗ шутланать. Унăн пархатарлă ĕçĕ Тӑван ҫӗршыва юратнине çирĕплетет. Вӑл пирӗн вӑхӑтри чӑн-чӑн паттăр, унӑн пурнӑҫӗ хисепе тивĕç.
Юлия ИСАКОВА,
9 класс вĕренекенĕ.
Иглин районĕ,
Чăваш Кăпавĕ ялĕ.