«Манăн ĕçсем лайăх вăй-хăват кÿреççĕ»

Ялта пурăнакан хĕрарăмсен ĕçĕ çителĕклех. Халь унчченхи пек кăмака хутса, çăкăр пĕçерсе нушаланмаççĕ пулсан та вĕсем кĕрĕк арки йăваласа лармаççĕ. Чылайăшĕ пушă вăхăт тупăнсанах алă ĕç тума ларать.

Юлашки вăхăтра этемлехĕн черчен пайĕ алмаз тĕррипе кăсăкланать. Тĕрĕ тĕрлекенсем те, çыхакансем те йышлă. Хамăр алăпа ăсталанă картинăсем çурта хăйне майлă хăтлăх кĕртнĕ, çыхнă алса-чăлха, кофта лавккаринчен чылай ăшă пек туйăнать. Тен, çапла та пуль, мĕншĕн тесен вĕсене юратса, чунпа хатĕрлетĕн.

Алмаз тĕрри – кăткăс ĕç, ун валли нумай вăхăт, чăтăмлăх тата тимлĕх уйăрмалла. Анчах ĕненетĕр-и, хатĕр ĕç чуна савăнтарать.

Авăркас районĕнчи Юламан ял хутлăхĕнче те алмаз тĕррин ăсти пурăнать. Вăл – Галина Иванова ăстаçă. Галина Альбертовна 30 çул ытла шкул çулчченхи учрежденинче ĕçленĕ. Халĕ вара хăйĕн пушă вăхăтне юратнă чун киленĕçне, алмаз тĕррине, халалланă. Уйрăмах ал ĕç ăсти савăт-сапа илемлетме кăмăллать.

Йĕпсĕр, çипсĕр тĕрĕ тума май çук пек туйăнать. Анчах алмаз тĕррин техникине алла илнĕ, технологие çирĕп пăхăнса пыракан Галина хăйĕн аллипе чылай илемлĕ япала ăсталанă.

Галина Альбертовна – пур ĕçе те ăста, тăрăшуллă кил хуçи арăмĕ. Вăл пĕçернĕ тутлă куличсемпе апат-çимĕçсем, йăрансем çинче ÿсекен тĕрлĕ сортлă чечексем çакна çирĕплетеççĕ. Халĕ вара çак списока ал ĕçĕ те хушăнать.

- Манăн ĕçсем лайăх вăй-хăват кÿреççĕ. Мĕншĕн тесен кашни картинăна, кашни ĕçе чун ăшшине шеллемесĕр, чĕререн савăнса пурнăçлатăп. Вĕсем кил-çурта хăтлăх, ырлăх илсе килессе шанатăп, - йăл кулса пĕлтерет ал ĕç ăсти.

Авăркас районĕ, Юламан ялĕ.