Чăваш ялĕсенче пурăнакансене чĕнсе калани

Кĕнекен пĕрремĕш пайне Эрĕнпур кĕпĕрнинчи Пелепей, Эрĕнпур, Çтерлĕ тата Ĕпхÿ уесĕсенчи 1783-1858 çулсенчи мĕнпур рекрутсем, 1783-1905 çулсенче Раççей Империйĕн тăшманĕсене хирĕç пынă вăрçăсене хутшăнакансем кĕрĕç.
Иккĕмĕш пай Ĕпхÿ кĕпĕрнинчи 1914-1917 çулсенче Пĕрремĕш тĕнче вăрçин паттăрĕсенчен тăрĕ.
Электронлă кĕнекен виççĕмĕш пайĕнче Хасан кÿлли (1938 ç), Халхин-Гол юхан шывĕ (1939 ç) çинчи вăрçăсен участникĕсем, 1939 çулта Хĕвел анăç Украинăна ирĕке кăларакансем, 1039-1940 çулсенче Финн вăрçин паттăрĕсем, Тăван çĕршывăн 1941-1945 çулсенче Аслă вăрçинче пуç хунисемпе участникĕсем (Пушкăрт АССРĕнчи 20 район), Совет Союзĕн Геройĕсем, В.Ленин, А.Невский, Б.Хмельницкий, Хĕрлĕ Ялав, Хĕрлĕ Çăлтăр, Мухтав (2 тата 3 степень), Тăван çĕршывăн Аслă вăрçин (1 тата 2 степень) орденĕсен кавалерĕсем, «Хастарлăхшăн», «Çапăçура палăрнăшăн», «Мускава хÿтĕленĕшĕн», «Сталинграда хÿтĕленĕшĕн», «Ленинграда хÿтĕленĕшĕн», «Кавказа хÿтĕленĕшĕн», «Совет поляр леш енне хÿтĕленĕшĕн», «Варшавăна ирĕке кăларнăшăн», «Белграда ирĕке кăларнăшăн», «Прагăна ирĕке кăларнăшăн», «Будапешта илнĕшĕн», «Кенигсберга илнĕшĕн», «Берлина илнĕшĕн» медальсен кавалерĕсем, Совет Союзĕпе Япони хушшинчи 1945 çулхи вăрçа хутшăннисем, «Японие çĕнтернĕшĕн» медале илме тивĕçнисем, тăшман тыткине лекнисем вырăн тупĕç.
Палăртнине пурнăçа кĕртме РФ Оборона министерствин сайчĕсен уçă çăлкуçĕсемпе, архив материалĕсемпе тата вырăнти таврапĕлÿçĕсен тĕпчевĕсемпе усă курăпăр.
Пирĕн тĕллев – Тăван çĕршыва хÿтӗлекен Пушкăрт енчи чăвашсен ячĕсене аса илесси.
Чăваш ялĕсенче пурăнакансене пурне те çак ĕçе хутшăнма, Тăван çĕршывăн ирĕклĕ пурнăçĕшĕн çапăçса пуçĕсене хунă паттăрсен ячĕсене аса илме, чăваш халăхĕн мухтавлă ывăлĕсемпе хĕрĕсен ячĕсене ĕмĕрлĕхех асра хăварма чĕнетпĕр. Пирĕн тивĕç – çамрăк ăрăва хамăрăн ĕçсемпе тăван çĕре, Тăван çĕршыва хÿтĕленĕ паттăрсене чунтан хисеплеме вĕрентесси. Пирĕн чăваш халăхĕ те, СССРти ытти халăхсем пекех, фашизма хирĕç тăрса Аслă Çĕнтерĕве пысăк тÿпе хывнă.
Чăваш наци ăслăлăхпа
ÿнер академийĕ ятĕнчен Мударист САФИН, Вячеслав ЕРОХИН, Анатолий ЕФРЕМОВ.