Республикăра Наци тумĕн кунне уявлаççĕ

Пушкăртстан – нумай нациллĕ республика. Кунта пушкăрт, вырăс, тутар, чăваш, мари тата ытти, пурĕ 160 тĕрлĕ халăх, пĕр-пĕринпе килĕштерсе пурăнаççĕ.

ПР Пуçлăхĕн Радий Хабировăн хушăвĕпе республикăра 2020 çултанпа Наци тумĕн кунне паллă тăваççĕ. Ăна çулталăкне икĕ хутчен - апрель уйăхĕн виççĕмĕш эрне кунĕнче тата сентябрь уйăхĕн иккĕмĕш эрне кунĕнче - уявлаççĕ. Наци тумĕ вăл – ахаль тум çеç мар, халăх кун-çулĕ, культури, историйĕ.

Паян Пушкăртстанра пурăнакан халăхсем, çав шутра чăвашсем те, наци кунĕн тумне анлăн паллă тума хатĕрленеççĕ. Республикăн тĕрлĕ кĕтесĕнчи ялсемпе хуласенче флешмобсем, куравсем, мастер-классем, наци тумĕсен парачĕсем, концертсем иртеççĕ.

Мероприятисем аваллăх тĕнчипе киленме, хамăр халăх историне тарăнрах пĕлме май параççĕ, халăхсен хушшинчи туслăха çирĕплетеççĕ. Çакă çитĕнекен ăрушăн уйрăмах пысăк пĕлтерĕшлĕ.