Раççей Геройĕ чăваш хастарĕсене тав тунă

Унта «Республика пуянлăхĕ» сумлă ята çичĕ çын тата икĕ организаци тивĕçнĕ. Мероприятие Раççей Геройĕ Николай Гаврилов генерал-лейтенант ертсе пынипе «Республика пуянлăхĕ» обществăлла патриотизм организацийĕ, «Достояние Республики» журналăн редакторсен канашĕ тата «Эткер» («Наследие») издательство çурчĕ йĕркеленĕ.
Патшалăх власть тата вырăнти хăйтытăмлăх органĕсене пулăшу панăшăн, наци культурине çирĕплетес, чăваш халăх йăли-йĕркине сыхласа хăварас, вĕрентÿ системинче тата çитĕнекен ăрăва патриотизмла воспитани парас ĕçре хастар ĕçленĕшĕн Раççейри чăвашсен федераллă наципе культура автономи председателĕн пулăшаканне, ЧР обществăлла палатăн пайташне Владимир Тяпкина, Ульяновск облаçĕн Чăнлă (Цильнинский) район администраци пуçлăхне Владимир Бабайкина, Раççейри чăвашсен федераллă наципе культура автономи председателĕн çумне, Тутарстанри наципе культура автономи председателĕн çумне Константин Малышева, Раççейри чăвашсен федераллă наципе культура автономи Канашĕн пайташне, Пелепей хулинчи чăвашсен наципе культура автономи ертÿçине Владимир Яковлева Раççейри чăвашсен федераллă наципе культура автономин (ертÿçи – Н.Ф.Гаврилов) Тав çырăвĕсене парса чысланă.
«Урал сасси» хаçат редакцийĕ вĕсене Раççей шайĕнчи наградăсене тивĕçнĕ ятпа саламлать, чăваш халăх йăли-йĕркине сыхласа хăварас, чĕлхипе культурине аталантарас, çитĕнекен ăрăва воспитани парас ĕçре малалла та хастар тăрăшма çирĕп сывлăх, иксĕлми вăй-хал сунать.
Инга АЛЕКСЕЕВА.