Нацисем хушшинчи ыйтусемпе ĕçлекен Канаш ларăвĕ иртнĕ

– … 150 ытла наци мирлĕ те килĕштерсе пурăнакан Пушкăртстаншăн нацисемпе конфессисем хушшинче хирĕçÿсем пуçарса яракан информаци хăрушлăхĕ сиксе тухма пултарассипе çыхăннă ыйтусене татса парасси власть органĕсемпе обществăлла организацисен çул-йĕрĕсенчен пĕри пулмалла. Çакă уйрăмах ятарлă çар операцийĕ пынă вăхăтра питĕ пĕлтерĕшлĕ, – тенĕ республика ертÿçи.
Ларăвăн ĕç йĕркинче ПР Пуçлăхĕн Обществăпа политика аталанăвĕ енĕпе ĕçлекен управлени ертÿçи, Канашăн яваплă секретарĕ Алексей Дербеко республикăри историпе культура центрĕсем пирки сăмах хускатнă.
– Историпе культура центрĕсем нумай çул хушши ĕçленĕ май конструктивлă общественность туртăмĕн чăн-чăн центрĕсем пулса тăнă. Пушкăртстанра 25 историпе культура центрĕ, Халăхсен туслăх çурчĕн филиалĕсем ĕçлеççĕ. Пирĕн историпе культура центрĕсен (ИКЦ) ĕçĕ-хĕлĕ культура тата чĕлхе ыйтăвĕсемпе кăна çырлахмасть. Малтанхи кунсенченех вĕсем салтаксем валли гуманитари пулăшăвĕ пухма пултарчĕç. ИКЦ специалисчĕсем те Донецкпа Луганскран килнĕ ачасем валли мероприятисем ирттереççĕ, – тенĕ Алексей Дербеко.
Пушкăртстан Пуçлăхĕ республикăн обществăлла пурнăçĕнче историпе культура центрĕсен пĕлтерĕшне пысăка хурса хак панă. Çак ларура Радий Хабиров Пушкăртстанри чăваш халăхĕн чĕлхипе йăли-йĕркине аталантаракан тата сыхлакан «Канаш» регионти общество организацийĕн ертÿçине Ирина Сухарева истори наукисен докторне, профессора, çĕр ытла сăвва юрра хывнă композитора тата юрăçа «ПР тава тивĕçлĕ культура ĕçченĕ» хисеплĕ ята парса чысланă.
«Юратнă республикăн ертÿçине манăн пултарулăха пысăк хак панӑшӑн тав тăватăп. Хаклă юлташсем, ĕçтешсем тавах ăшă сăмахсемшĕн. Эпир пĕр команда. Пĕрлĕхре – пирĕн вăй. Çĕнтерÿ пирте пулĕ.
Тăван чӑваш халăхĕшĕн, Пушкăртстаншăн, Чăваш Еншĕн тата Раççей-аннемĕршĕн тăрăшатăп», – тесе çырнă Ирина Витальевна хăйĕн социаллă сечĕсенче салам сăмахĕсене йышăннă май.
Ирида МАТНИЯЗОВА.
Ĕпхÿ хули.