Пур хыпар та
Общие статьи
27 Майӑн 2020, 14:10

Ачасене мĕнрен хÿтĕлемелле?

Йăлана кĕнĕ тăрăх‚ Ачасене хÿтĕлемелли куна июнь уйăхĕн 1-мĕш кунĕнче 60 ытла çĕршывра паллă тăваççĕ. Аслисем уяв кунне ачасем валли тĕрлĕ мероприятисем йĕркелеççĕ‚ вăл илемлĕ те асра юлмалла пултăр тесе тăрăшаççĕ. Пирвайхи хут Ачасене хÿтĕлемелли куна 1950 çулта паллă тунă. Пĕрремĕш мероприятисен тĕллевĕ ачасен ыйтăвĕсене татса пама пĕтĕм тĕнчери общественноçа явăçтарасси пулнă. Паянхи кун çамрăк ăрăва мĕнрен хÿтĕлемелле-ха? Шăпах çак ыйту çине эпир ачасене хăйсене хурав пама ыйтрăмăр.

Евгений Гильданов, 14 çулта. Благовещенск хули.
- Халĕ пушă, никама та кирлĕ мар хуралтăсем, çÿп-çап тултарса хунă путăк-шăтăксем нумай. Вĕсем ачасем умне чăннипех те хăрушлăх кăларса тăратма пултараççĕ. Çÿп-çап тăкнă путăксенче тĕрлĕ чир-чĕр çаклатасси питĕ ансат. Заводсемпе фабрикăсен ĕçĕ-хĕлĕ хыççăн тухакан тĕтĕм-сĕрĕм çыннăн пурнăçне кĕскетет. Çавăнпа та экологи ыйтăвĕ çине те пысăк тимлĕх уйăрмалла.
Виктор Ефремов, 12 çулта. Мияки районĕ.
- Ачасене хĕсĕрленинчен (насилие) хÿтĕлемелле. Тĕслĕхрен, шкулта аслă классенче вĕренекенсем кĕçĕн классенчи ачасене кÿрентерме пăхаççĕ. Çавăн пекех ачасемпе аслисене çул-йĕр правилисене пăхăнман водительсенчен хÿтĕлемелле. Вĕсем çынсен сывлăхне тата пурнăçне пысăк хăрушлăха кĕртсе ÿкереççĕ.
Анна Тарасова‚ 12 çулта. Пелепей районĕ‚ Приютово поселокĕ.
- Ман шутпа, ачасене инкекрен сыхламалла. Унсăр пуçне атте-аннесем хăйсен тĕпренчĕкĕсене сиенлĕ йăласенчен‚ пăлханмалли лару-тăрусенчи пуçпа шухăшламан ĕçсенчен‚ урамăн сиенлĕ витĕмĕнчен‚ наркотикпа алкоголизм авăрне лекессинчен хÿтĕлемелле. Кирек хăш сиенлĕхрен те‚ хăрушлăхран та хÿтĕлев пурри çинчен те манмалла мар. Тĕп хÿтĕлев вăл – çирĕп те туслă çемье. Унта çеç ача пулăшу‚ ăнлану тата сĕнÿ-канаш илме пултарать. Çакна аслисем яланах асра тытмалла.
Ангелина Ефремова, 9 çулта. Мияки районĕ.
- Ман шутпа ачасене алкогольтен, наркотиксенчен сыхламалла, мĕншĕн тесен вĕсем сывлăхшăн питĕ сиенлĕ. Унсăр пуçне çамрăк ÿт-пÿ çак сиенлĕ япаласем патне питĕ хăвăрт хăнăхать. Наркотикпа тата алкогольпе усă куракан çынсем час-часах чирлеççĕ, вилекеннисем те пур. Ачасем гаджетсемпе тата телефонсемпе нумай выляççĕ, тĕнче уçлăхĕнчи тĕрлĕ хăрушă сайтсене(экстремизмла, ачасене вилĕм патне илсе çитерекен сайтсем) кĕреççĕ. Унсăр пуçне ачасене ăс-тăн енчен сывă мар çынсенчен хÿтĕлемелле. Вĕсенчен тем те кĕтме пулать. Çавăн пекех ачасене те, аслисене те террористсенчен хÿтĕлемелле.
Эвелина (11 çулта) тата Илья (8 çулта) Сунагатуллинсем. Чекмагуш районĕ.
- Пире никамран та, нимрен те хÿтĕлмелле мар. Аттепе аннен ăшă çуначĕсем айĕнче лăпкă та канлĕ. Вĕсем пире яланах пулăшса пыраççĕ, тĕрлĕ инкек-синкекрен хÿтĕлеççĕ. Пирĕн те вĕсене май пур таран пулăшас, савăнтарас килет. Тĕнчере яланах мир пултăр, кашни ачан пичĕ çинче савăнăçлă кулă вылятăр. Ашшĕ-амăшсем хăйсен ачисене ырă кăмăллă та тарават пулма, аслисене хисеплеме, кĕçĕн çулхи ачасене кÿрентермессе, кирлĕ чухне пулăшма вĕрентмелле. Мӗнпур ачана Тӑван ҫӗршыва чунтан юратма, телейпе савӑнӑҫ, сывлӑх тата пӗр-пӗрне ӑнланма сунатпăр.
Надежда РОДИОНОВА хатĕрленĕ.