Пур хыпар та
Общие статьи
18 Ноябрӗн 2020, 12:42

Шыв ачи

Аниса инке, упăшкине вăрçа ăсатсан, килĕнче виçĕ ачапа тата тăваттăмĕшĕпе йывăрлă тăрса юлать. Пĕр уйăх вăхăт иртсен вăл кашни ир çырмари çăла çÿренĕ пек кĕвентепе шыва каять. Икĕ витрине те «тăрна майлă» меслетпе шыв ăсса тултарать те хуллен кăна сăрталла утса яла çитекен сукмакпа ял урамне пырса кĕрет. Унта вăл кÿршĕ Çинука курать.

- Анисса, шыва кайрăн-им? - хушать сăмах Çинук.
- Кайнăччĕ те, шывсăр пуçне «шыв ачине» те илсе килеп пулас.
Çинук Анисса аппан ача çуратма вăхăчĕ çитнине хăвăрт ăнланса илет.
Вăл вăхăтра çапла калатчĕç. «Ачине ăçтан илнĕ?» тесен: «шывран, купăста хушшинчен, куян улмуççи умне хурса хăварнă», - тесе хуравлатчĕç.
Çинук Аниссана шывне лартса пахчари мунчине пыма хушать.
Ăшă мунчара ачи хăвăрт та çăмăл çуралать. Хĕр ача пулать.
Ачана çуса-тасатса таса çемçе çитсăпа чĕркесе, пÿрте илсе кĕрсе, малтанах хатĕрлесе хунă сăпкана вырттараççĕ.
Ачасем ыйхăран вăранса ура çине тăрсан сăпкана пăхаççĕ - унта пĕчĕк кăна хитре ача выртать.
- Анне, сăпкари ача камăн вăл? - ыйтаççĕ шăпăрлансем.
- Вăл шыв ачи, - хуравлать амăшĕ. - Ирхине шыва кайнăччĕ те çавăнта çăлтан витрене çакланса тухса килчĕ вăл. Халь яланах пирĕнпе пулать.
- Ай, шыв ачи! Шыв ачи! - савăнаççĕ ачасем.
Георгий ТИХОНОВ. Салават хули.