«Ырăлăх тата юмартлăх» уявĕ

Сывлăхĕсем начар пулнипе тулли пурнăçпа пурăнаймансем валли тематика лапамĕсем йĕркеленĕччĕ: «Ырă сун» арт-объект, «Телей таканĕ», «Лашасем» мастер-классем. «Ырăлăх пайăркисем» йăпанупа вăйă программи те хаваслă иртрĕ. Ачасем ташларĕç, вылярĕç, тупмалли юмахсен тупсăмĕсене шырарĕç, мультфильмсенчи паллă сăнарсемпе пĕрле хаваслă ĕçсем пурнăçларĕç.
Хĕр ачасемпе арçын ачасене «Алăран тытăнар, юлташсем!» ача-пăча ĕçĕсен пуян куравĕ уйрăмах илĕртрĕ. Кунта вĕсем хăйсем аллисемпе ÿкернĕ сăн ÿкерчĕксене, хайлавсене курма пултарчĕç.
Пухăннисене Пелепей район администраци пуçлăхĕн çумĕ Александр Смородин уяв ячĕпе саламласа çирĕп сывлăх сунчĕ. «Пĕтĕм Раççейри инвалидсен обществин» республика организацийĕн Пелепей хулипе районĕнчи уйрăмĕн председателĕ Любовь Коробова конкурссенче парнеллĕ вырăнсене çĕнсе илнĕ ачасене дипломсем парса чысларĕ, малашне те çитĕнÿсем тума ăнăçу сунчĕ.
Уяв концертне «Арабеск», «Домисолька» хор, «Ритмы» тата «Талисман» ушкăнсем хутшăнчĕç. Пелепей хулинчи «Ягодка» начар куракансен коррекци шкулĕн ачисем хаваслă ташă парнелерĕç. Асăннă ушкăна Гульнара Альмухаметова тухăçлă ертсе пырать. Рената Желновапа Элина Кравчук (ертÿçи – Светлана Ипатова) çемье çинчен камăллă юрă шăрантарчĕç. Рамина Шафикова (авторĕ тата ертÿçи – Наталья Зиязова) «Другая» сăвва илемлĕ вуласа пачĕ. Аделина Шамсутдинова «Молоденький соловей» халăх юррине юрларĕ. Куракансем мĕнпур пултарулăх номерĕсене тăвăллăн алă çупса йышăнчĕç.
Пелепей хулипе районĕнчи сывлăхĕсем начар пулнипе тулли пурнăçпа пурăнайман ачасемпе çамрăксен реабилитаци уйрăмĕн ертÿçи Гульнара Гарифуллина ачасемпе вĕсен ашшĕ-амăшĕсене, уяв хăнисене чылай ăшă сăмах каларĕ. Унсăр пуçне вăл «Ырăлăх тата юмартлăх» («Добро и милосердие») ача-пăча уявне йĕркелесе ирттерме пулăшнă спонсорсене чунтан тав турĕ. Вĕсем – «Сателит» ООО тĕп директорĕ Александр Кутьин, «Пелепейри машинăсем тăвакан завод» ООО тĕп директорĕ Ринат Мусин, «Олимп» КРК ООО тĕп директорĕ Павел Кривов, «УТТ» ООО тĕп директорĕ Игорь Бархатов, «Экодент» ООО директорĕ Зульфия Гафурова, «Пелепейри хула электричество сечĕсем» ООО директорĕ Алексей Травницкий, «Союз-Кредит» ОВК кредитпа потребитель кооперативĕн директорĕ Наталия Федотова, «Газпром газораспределение Уфа» Пелепей хулинчи филиалăн директорĕ Виль Мухаметдинов, Махалля ММРО №2161 имамĕ-мухтасибĕ Ильдар Галиев, Андрей Кирсанов благочиннăй протоиерей, Приютово поселокĕнчи Богородице-Тихвенский хĕрарăмсен чиркĕвĕн настоятелĕ Иосифа игуменья, Павел Токаревпа Артур Сагитов уйрăм усламçăсем тата ыттисем.
Мероприяти шайĕнче аслисемпе ачасем сывлăхĕсем начар пулнипе тулли пурнăçпа пурăнайман ачасене хăйсен чун ăшшипе юратăвне парнелерĕç. Хĕр ачасемпе арçын ачасем уяв лару-тăрăвне путрĕç. Мероприяти вĕçĕнче кашни ача парне илме тивĕçрĕ. Ачасен сăнĕсем телейпе çиçрĕç, уяв çÿллĕ шайра иртрĕ.
Ирида НОВИКОВА.
Пелепей хули.