Юбилей çемье юратăвне çирĕплетет

Паллах, çур ĕмĕр çемьеллĕ пурнăçра савăнăçĕ те, хурлăхĕ те пулнă, анчах асра чи лайăххи, чи çутти çеç тăрса юлнă. Чĕрисенче вара – пĕрле пурăнса ирттернĕ çулсемшĕн пĕр-пĕрне тав туни.
Анатолий Ивановичпа Агрепина Парфирьевнашăн 1974 çулта пĕлтерĕшлĕ те паллă, савăнăçлă пулăм пулса иртнĕ – çамрăксем хăйсен шăписене пĕрлештернĕ.
Агрепина Парфирьевна Треппел ялне физкультура учителĕ пулса ĕçлеме килнĕ. Çартан таврăннă Анатолий Виноградов колхозра водитель ĕçĕнче тăрăшнă. Çамрăксем кунтах пĕр-пĕрне тĕл пулнă, куç хывнă. Мăшăр пĕлтернĕ тăрăх, вĕсем пĕр-пĕрне пĕрре курсах савнă. Анатолий хĕре унăн мăшăрĕ пулма ыйтсан Агрепина пĕр шухăшламасăр килĕшнĕ. Мăшăр 30 çул ытла юратнă ĕçе çÿренĕ: пĕри ачасене вĕрентнĕ, тепри руль умĕнче ларнă. Иккĕшĕ те «Ĕç ветеранĕ» ятсене тивĕçнĕ.
Виноградовсем çут тĕнчене пилĕк ача парнеленĕ, кашнинех тивĕçлĕ пĕлÿ панă. Паянхи кун юбилярсене 11 мăнук пурри савăнтарать. Сумлă мăшăра пĕр ял çыннисем питĕ хисеплеççĕ. Килти хушма хуçалăх ял çыннишĕн пуянлăх пулнине шута илсе Виноградовсем паянхи кун та ĕнепе сыснасем, чăх-чĕп усраççĕ, пахча-çимĕç, улма-çырла çитĕнтереççĕ.
«Çемье телейĕ мĕнре-ши?» тесе ыйтсан çемье пуçĕ йăл кулса: «Пĕр-пĕрне шаннинче, ăнланнинче, каçарма пĕлнинче, çынсем умĕнче хутшăнăва сÿтсе явманнинче, ачасемпе мăнуксемшĕн тĕслĕх пулнинче» тет.
Виноградовсен çемйи çамрăк ăрушăн та тĕслĕх шутланать. Çемьере яланах юратупа килĕшÿ хуçаланать. Пурнăçра пурте пулнă. Анчах тÿсĕмлĕхпе ăнлану 50 çул пĕр-пĕринпе килĕштерсе пурăнма май панă. Ылтăн туй – пĕрлехи пурнăçăн, чылай çул хушши пĕрле тăрăшса ĕçленин çимĕçĕ. 50 çулхи юбилей мăшăрăн çулсем витĕр тăсăлакан юратăвне те çирĕплетсе парать. Паллах, çакăн чухлĕ пурăнма мĕн чухлĕ чăтăмлăх, шанăç, ăс-хакăл кирлĕ.
– Хисеплĕ юбилярсем, эсир пысăк юратупа парăнулăхăн тĕслĕхĕ шутланатăр. Çур ĕмĕр каялла хăвăр туйăмăрсене хут çине çыртарнă пулсан та, кулленхи пурнăçра, уявсенче, савăнăçпа хурлăхра ялан пĕрле. Мăшăрланнăранпа 50 çул çитнине паллă тунă май эсир малтанхи пекех пĕр-пĕрин çине юратса, ăшшăн пăхатăр. Сире çирĕп сывлăх, вăрăм та телейлĕ пурнăç сунатпăр, – тенĕ Треппел ял хутлăх администрацийĕн пуçлăхĕ Ирина Пашкина мăшăра саламласа.
Треппел ял Канашĕнчи ĕçсен управляющийĕ Марина Григорьева тата вырăнти культура çуртĕнче ĕçлекен Галина Константинова Виноградовсен çемийне хаваслă та савăнăçлă кунсем, çирĕп сывлăх тата пысăк телей суннă.
Ирида НОВИКОВА.
Авăркас районĕ, Треппел ялĕ.