«Пушкăрт урхамахĕ» фестивале Азербайджанран делегаци килсе çитнĕ

«Пушкăрт урхамахĕ» фестиваль лашасем ĕрчетессипе ĕçлекен специалистсемпе ăсчахсене, декораципе ĕçлев ÿнерĕн ăстаçисене, алăстисемпе ÿнерçĕсене, пултарулăх коллективĕсемпе фольклористсене, этнографсемпе спортсменсене тата асăннă чĕр чуна юратакансене пĕрлештерет. Çавăн пекех мероприятие Азейрбайджанпа Пĕрлештернĕ Араб Эмирачĕсен, Белоруссипе Кăркăстан, Китайпа Узбекистан делегацийĕсем те хастар хутшăнаççĕ.

Сăмахран, Азербайджанран Агдам лаша завочĕн директорĕ Эльман Гадыров, Карабах лашисен ассоциацийĕн президенчĕ Фарид Мустафаев тата вице-президенчĕ Яшар Гулузаде килсе çитнĕ. Яшар Гулузаде фестиваль ĕçне пĕрремĕш хут мар ĕнтĕ хак парать, уяв программине пуянлатать.

 - Карабах урхамахĕсем – Азербайджанăн наци мăнаçлăхĕ. Паян эпир пушкăрт лашисем Пушкăртстан Республикин мăнаçлăхĕ пулнине куратпăр. Унччен маларах вĕсем çинчен совет саманинчи кĕнекесенче вуласа пĕлтĕм. Иртнĕ çулхине «Пушкăрт урхамахĕ» фестивальте асăннă ăрата регистраци ирттернине документ панăшăн хĕпĕртетĕп, - пĕлтернĕ хăйĕн шухăшне Яшар Гулузаде.

«Пушкăрт урхамахĕ» пушкăрт ăратлă лашасен Пĕтĕм тĕнчери фестиваль ял хуçалăх, наукăпа культура шайĕнче халăхсен хушшинчи çыхăнăва аталантаракан лапам пулса тăрать.

Фото: Нурзия Хасанова.