Чăваш Хурамал педагогĕ Гран-прие тивĕçнĕ

Ноябрь уйăхĕн 26-мĕшĕнче Ĕпхÿ хулинче «Аслă Çĕнтерĕве – 80 çул: астăвăм тата ăрусен ăс-хакăл опычĕ» Епархи Табынски вулавĕсен чиркÿпе общество форумĕ вун тăваттăмĕш хут иртнĕ.

Форумăн пленарлă ларăвĕнче Ĕпхÿ тата Пушкăртстан митрополичĕ Никон, ПР вĕрентÿпе наука министрĕн пĕрремĕш çумĕ Светлана Антипова тата Вырăс православи чиркĕвĕн тĕн вĕрентĕвĕпе катехизаци Синодаллă уйрăмĕн мероприятийĕсемпе конкурссен секторĕн ертÿçи Трифон (Умалатов) иеромонах «Вĕрентекенĕн кăмăл-сипет паттăрлăхĕшĕн» педагогикăпа воспитани шайĕнчи, ачасемпе 20 çулчченхи çамрăксемпе ĕçлессине хак паракан Пĕтĕм Раççейри конкурсăн регион тата регионсем хушшинчи тапхăрĕсен çĕнтерÿçисене чысланă.
Пысăк чыса тивĕçнисен шутĕнче Авăркас районĕнчи Чăваш Хурамал ялĕнчи «Альтаир» хушма пĕлĕвĕн педагогĕ Юрий Леонтьев пулнă. Регион шайĕнчи тата Атăлçум федераллă округри тапхăрсен кăтартăвĕсене шута илсе Юрий Харитонович «Иртни çинчен сăмах хускатар» («О прошлом замолвите слово») ĕçĕшĕн Гран-при çĕнсе илнĕ. Паянхи кун Ю.Х. Леонтьев асăннă конкурсăн икĕ Гран-при хуçи шутланать. Пĕрремĕшне сумлă вĕрентекен кăçалхи çу кунĕсенче илме тивĕçнĕччĕ.
Ентешĕмĕре наградăсен пухмачĕ пуянланнă ятпа саламлатпăр! Асăннă конкурсăн виççĕмĕш тапхăрĕнче те (финалта) ăнăçу сирĕн енче пуласса шанатпăр.
Ирида НОВИКОВА. Ĕпхÿ хули.