«Азамат» фестиваль вун тăватă тĕрлĕ халăх ачисемпе çамрăкĕсене пуçтарчĕ

Унта вокал, ташă, инструментпа калакансен ушкăнсемпе уйрăм сцена çине тухакансем, пурĕ 350 вĕренекенпе студент, хутшăнчĕç.
Фестиваль идеологи енчен пысăк пĕлтерĕшлĕ. Вăл республикăра пурăнакан халăхсен хушшинчи туслăха çирĕплетме, пĕр-пĕрин культурипе паллашма май парать. Пултарулăх конкурсне вун тăватă тĕрлĕ халăх ачисемпе çамрăкĕсем (вырăссемпе пушкăртсем, тутарсемпе чăвашсем, марисемпе армянсем, поляксемпе нимĕçсем, еврейсемпе узбексем, аварсемпе таджиксем, туркменсемпе кăркăссем, латышсем) хутшăнчĕç. Мероприятие уçнă вăхăтра пуçтарăннисем Раççей тата Пушкăртстан гимнĕсене итлерĕç çеç мар, вĕсене пĕтĕм чунтан шăрантарчĕç те.
Тĕрлĕ наци тумĕсем, зала хăйне майлă илемлетни, мероприяти Ĕпхÿри чи илемлĕ театрсенчен пĕринче иртни фестиваль чысне-сумне çултан-çул ÿстерет.
Сумлă хăнасене çăкăр-тăварпа тата пушкăрт халăх ĕçмипе, кăмăспа, кĕтсе илчĕç. Чĕннĕ хăнасен шутĕнче ПР культура министрĕн çумĕ И.И. Мухьянов, Ĕпхÿ хулинчи Обществăлла палата ятĕнчен И.Д. Асадуллин, Ĕпхÿ хула администрацийĕн Вĕрентÿ управленийĕн специалисчĕ Т.А. Сибагатуллин, ПР хăй ирĕкĕпе йĕркеленекен батальонсен Тĕп штабĕн ертÿçи Б.Е. Гордеев отствкăри полици полковникĕ, ПР чăваш культура обществин председателĕн çумĕ И.В. Борисов, ПР нимĕçсен пĕрлĕхĕн председателĕ Л.К. Каспер, ПР таджик культура центрĕн председателĕ К.М. Сатторов, «Дуслык» тĕрĕк халăхĕсен этнокультура центрĕн председателĕ П.В. Демченко, азербайджан диаспорин ертÿçи Р.И. Исмагилова, белорус общество пĕрлĕхĕн председателĕ Р.Р. Зюзько тата ыттысем пулчĕç. Хăнасене кĕтсе илес церемоние пушкăрт гимнази интерначĕн «Дарман» кураистсен, пушкăрт вырсарни шкулĕн «Сăрнай», Авăркас районĕнчи сĕрме купăс калакансен ансамблĕсем, «Элем» пултарулăх ушкăнĕ (Ĕпхÿ хулинчи «Дуслык» вĕрентÿ учрежденийĕ) илем кÿчĕç.
Форума уçса ПР культура министрĕн çумĕ Ильнур Мухьянов, ПР чăвашсен наципе культура автономийĕн председателĕ Виталий Викторов, ПР чăваш культура обществин ертÿçи, йĕркелÿ комитечĕн председателĕ Юрий Михайлов сăмах каларĕç, мероприятие хутшăнакансене ăнăçу сунчĕç.
Ачасем вун икĕ тĕрлĕ номинацире пултарулăхĕсене кăтартрĕç. Икĕ номинацире пĕрремĕш вырăнсене чăваш ачисем çĕнсе илчĕç. «Иструментпа каласси» (соло) номинацире П.М. Миронов ячĕллĕ чăваш вырсарни шкул вĕренекенне Дарья Сидорована, «Вокал» номинацире Пелепей хулинчи «Урал-Батыр» наци культурисен центрĕнчи Андрей Сидорова çитекенни пулмарĕ. Конкурс çĕнтерÿçисемпе участникĕсем пурте ПР Культура министерствин дипломĕсемпе Тав çырăвĕсене тивĕçрĕç.
Пушкăртстанри чăвашсен наципе культура автономийĕ ПР Культура министерствин форум ирттерессипе лартнă тĕллевĕсене туллин пурнăçланă тесе шутлать. Нацисем хушшинчи туслăха çирĕплетекен пысăк мероприятие йĕркелес ĕçе пире шанса панăшăн чунтан тав тăвать.
Юрий МИХАЙЛОВ,
ПР чăваш культура обществин председателĕ.