«Чăваш тĕнчи» Урала çитнĕ

Çак кунсенче Федоровка районĕнчи Урал ялĕнчи культура çуртĕнче чăваш халăхĕн культурипе кулленхи пурнăçне халалланă «Чăваш тĕнчи» куçса çÿрекен курав иртнĕ. Выставка ертÿçи - Анатолий Ефремов «Чăваш наци конгресĕ» регионсем хушшинчи обществăлла организацин Аслă Канашĕн пайташĕ, Пушкăрстанри чăвашсен Канашĕн председателĕн çумĕ.

Анатолий Николаевич чăваш халăхĕн тата Чăваш Республикин историйĕ, республикăри ял-хуласенче пурăнакансен йышĕ çинчен питĕ интереслĕ каласа панă. Унсăр пуçне вăл алăпа тытса пурнăçламалли техникăпа килĕшÿллĕн тунă ĕçсене курава тăратнă. Çав шутра тĕрленĕ минтерсем, минтер пичĕсем, ал шăллисемпе сĕтел çиттисем, çавăн пекех паянхи кунăн пĕр-пĕр стилĕ майлă çĕленĕ арçын тата хĕрарăм тумĕсем, кĕнекесемпе альбомсем пулнă. Чăваш хастарĕ пухăннисене тăван халăхăн юрă-кĕвĕ культурипе, музыка инструменчĕсемпе те паллаштарнă.

Мероприяти вăхăтĕнче Урал тата Ашкатар ялĕсенчи Ветерансен канашĕн председателĕ Г.В Данилов Александра Степановна Данилована 95 çулхи юбилей ячĕпе саламланă, кинемее парне парса хавхалантарнă. Çавăн пекех Федоровка районĕнчи чăвашсен Канашĕн ертÿçи Анна Ремпель те тухса сăмах каланă.

Урал тата Ашкатар ялĕсенчи чăвашсем Анатолий Ефремова халӑх йăли-йĕркисене упраса хăварас тата вĕсене сарас, çамрăк ăрăва тивĕçлĕ воспитани парас ĕçе пысăк тÿпе хывнăшăн чунтан тав тăваççĕ.

Федоровка районĕ, Урал ялĕ.