Октябрьский хулинче иртнĕ ăмăрту малашлăха çул уçнă

Октябрьский хулинче биатлон спорчĕпе Пушкăртстан Республикин ăмăртăвĕ иртнĕ. Виçĕ кун тăршшĕ 11-12, 13-14 çулхи тата вĕсенчен кĕçĕнрех хĕр ачасемпе арçын ачасем уйрăм чупăшура, кросс-спринтра тата эстафетăра вăй виçнĕ.

Ермеккейĕнчи спорт шкулĕнче ĕçлекен Николай Федоров тренерăн воспитанникĕсем лайăх кăтартусемпе савăнтарнă. Кросс-спринтра Илина Габдуллина (Ермеккей ялĕ) иккĕмĕш вырăн йышăннă, Дарина Федорова (Янăшма ялĕ) виççĕмĕш пулнă.

Эстафетăра та Илина хутшăннă ушкăн финиша пĕрремĕш, Даринан ушкăнĕ тăваттăмĕш çитнĕ.

Çак ăмăрту пĕтĕмлетĕвĕсем тăрăх Дарина Федорована Пушкăртстанăн пĕрлешÿллĕ ушкăнне кĕртнĕ. Çитес вăхăтра вăл Атăлçи федераллă округĕн Саранск хулинче иртекен ăмăртăва хутшăнĕ. Ăнăçу сире, хĕрсем!