Пур хыпар та
Пĕлĕр, пирĕннисене
25 Мартӑн , 15:00

«Хĕрарăм – наци амăшĕ» конкурс çĕнтерÿçисене чысланă

Ĕпхÿри «Торатау» Конгресс-холра «Хĕрарăм – наци амăшĕ» IX Пĕтĕм Раççейри конкурс çĕнтерÿçисемпе финалисчĕсене чысланă.

«Хĕрарăм – наци амăшĕ»  конкурс çĕнтерÿçисене чысланă
«Хĕрарăм – наци амăшĕ» конкурс çĕнтерÿçисене чысланă

Конкурса кашни çулах «Пушкăрт хĕрарăмĕсен обществи» обществăлла организаци ирттерет. Ăна ПР Культура министерствипе «Раççейри халăхсен ассамблейи» Пĕтĕм Раççейри обществăлла организацийĕ йĕркелеме пулăшаççĕ. Ăмăртăвăн тĕп тĕллевĕсем – хĕрарӑмсен обществăри ĕçĕ-хĕлне хак пани, хĕрарăм-аннесен статусне ÿстерни, Раççей шăпинче хĕрарăмсен обществăпа политика тивĕçне палăртни. Кăçал ятарлă çар операцине хутшăнакансен амăшĕсене пысăк тимлĕх уйăрнă.
Конкурса Курган, Эрĕнпур, Свердловск, Челябинск облаçĕсенчи, Тутарстанпа Пушкăртстан республикисенчи, Пермь крайĕнчи, Хантă-Манси автономи округĕнчи, Мускавпа Эрĕнпур хулисенчи хĕрарăмсем хутшăннă. Йĕркелÿçĕсем пĕтĕмĕшле 500 ытла заявка йышăннă. Шăпах вĕсенчен чи тивĕçлисене, 53 хĕрарăма, чаплă церемоние йыхравланă.
Çĕнтерÿçĕсене çакăн пек номинацисем тăрăх палăртнă: «Наци амăшĕ» – нумай ачаллă аннесем хушшинчи паллă ăсчахсем, ертÿçĕсем, спортсменсем, обществăпа политика деятелĕсем, СВО участникĕсемпе Раççей геройĕсене çитĕнтерекен аннесем; «Волонтер» – ятарлă çар операцине хутшăнакансем валли гуманитари пулăшăвĕ пухакан волонтер юхăмĕсен хастар участникĕсем; «Культура» – культура тата ÿнер шайĕнче палăрнă хĕрарăмсем; «Медицина ĕçченĕ» – СВО зонинче тăрăшса ĕçленĕ хĕрарăм-тухтăрсем; «Педагог» – Раççей Федерацинчи халăхсен тăван чĕлхине, литературипе культурине вĕрентекенсем; «Бизнес-леди» – фашизма çĕнтерес тĕлĕшпе ыркăмăллăхпа общество ĕçне хастар хутшăнакан хĕрарăм-усламçăсем; «Ăстаçă» – халăх ал ĕçне саракан хĕрарăмсем; «Ағинәй» – общество ĕçне хастар хутшăнакан, СВО участникĕсене пулăшу паракан, халăх хисепне тивĕçнĕ 60 çултан иртнĕ хӗрарӑмсем.
«Наци амăшĕ» номинацире финала тухнисем нумайăн пулнă. Кунта 20 хĕрарăм палăрнă. Зал ятарлă çар операцине хутшăнакан паттăрсен амăшĕсене ăшшăн саламланă. Пысăк хисепе тивĕçнисен шутĕнче Давлекан районĕнчи Канчăлав ялĕнче пурăнакан пилĕк ывăл амăшĕ Наталья Иванова пулнă. Унăн тăватă ывăлĕ ятарлă çар операцине хутшăнса Тăван çĕршыв интересĕсене хÿтĕлеççĕ. Наталья Валерьевна «Телей территорийĕ» тата «Ĕпхÿ хосписĕ» ыркăмăллăх фончĕсен Попечитель канашĕн председателĕн Каринэ Хабирова аллинчен Рабига Кушаева ячĕллĕ медале илнĕ.
Çавăн пекех чыс-сума тивĕçнисен шутĕнче ПР чăвашсен канашĕн ертÿçи Ирина Сухарева истори наукисен докторĕ, профессор тата Авăркас районĕнчи Степановка шкулĕнче чăваш чĕлхипе литературине вĕрентекен Алевтина Артемьева пулнине палăртса хăварма кăмăллă. Ирина Витальевна финала тухнă, Алевтина Пантелеевна вара «Педагог» номинацинче палăрнă. Конкурс йĕркелÿçисем вĕсен ĕçĕсене пысăка хурса хакланă, Дипломсем пама йышăннă.
«Хĕрарăм – наци амăшĕ» IX Пĕтĕм Раççейри конкурс лауреачĕсем дипломсемпе медальсем, кубоксем илнисĕр пуçне 1812 çулхи Аслă вăрçă хыççăн пушкăрт хĕрарăмĕсен наци костюмĕн пайĕ пулса тăнă «француз тутăрне» те тивĕçнĕ.
Ирида НОВИКОВА.
Ĕпхÿ хули.

«Хĕрарăм – наци амăшĕ»  конкурс çĕнтерÿçисене чысланă
«Хĕрарăм – наци амăшĕ»  конкурс çĕнтерÿçисене чысланă
«Хĕрарăм – наци амăшĕ»  конкурс çĕнтерÿçисене чысланă
«Хĕрарăм – наци амăшĕ»  конкурс çĕнтерÿçисене чысланă
«Хĕрарăм – наци амăшĕ» конкурс çĕнтерÿçисене чысланă
Автор:Ирида Матниязова
Читайте нас: