Шкул ачисен ĕçĕсенче йăнăшсем нумайрах

Диктанта зачет урок ирттерсе Пелепейĕнчи чăваш гимназийĕн чăваш чĕлхипе литратурине вĕрентекен П.Г. Кирилова вуларĕ. Ăна 53 çын çырчĕ. Ÿсĕм енчен пăхсан, чи асли 55, чи кĕçĕнни 11 çулта. 25 çын «5», 17 – «4», 5 – «3» , 2 – «2» паллăлăх çырчĕç. Мероприяти пурне те хавхалантарчĕ. Федоровка районĕнчи Ашкатар шкулĕн директорĕ С.А. Вальщиков чăваш пулнишĕн, чăвашла диктант çырма тÿр килнĕшĕн, чăвашла калаçма-юрлама май пурришĕн савăнса калаçрĕ, пурне те тăван чĕлхерен вăтанмасса, пĕр-пĕрне хисеплесе пурăнма ыйтрĕ. Авăркас районĕнчи Пишкайăн шкулĕнче чăваш чĕлхипе литературине вĕрентекен Е.В. Савельева чăваш чĕлхине хисеплеме, юратма ыйтрĕ. Пирĕн шутпа, республикăри чăваш чĕлхипе литературине вĕрентекенсемпе канашланă хыççăн çакăн пек пĕтĕмлетÿ тума пулать: диктанта ытларах аслă ÿсĕмри çынсем, вĕрентекенсем çырнă. Паллах, вĕсен ĕçĕсенче йăнăшсем сахалрах, тĕрĕслеме те кăмăллă. Шкул ачисен ĕçĕсенче вара йăнăшсем нумайрах тĕл пулаççĕ. Çакă чăваш чĕлхипе литература урокĕсем сахал пулнинчен, чăвашла хаçат-журнал, кĕнеке вуламаннинчен, калаçманнинчен килет. Хаçатра та, социаллă сетьре те лайăх паллăпа вĕренекенсене палăртса хăвартăмăр.

Лариса КОРОТАЕВА, филологи наукисен кандидачĕ.