Апат пĕçернĕ чухне яланах юрлать

Вырма ӗçĕсем вӗçленсе пыраççĕ, анчах хальлӗхе уй-хирти ӗҫсем пĕтмен-ха. Хура тул тата техника культурисем юлаҫҫӗ-ха. Кӗрхи тырӑсем акаççĕ.
- Кашни кунах 15-17 ҫын валли апат хатӗрлетӗп, вӗсем уй-хирсенче тата трактор паркӗнче ӗҫлеҫҫӗ. Механизаторсем валли эпир час-часах шӳрпе тата пӑтӑ хатӗрлетпӗр, - тет Татьяна Райко. - Ачасем Женьӑпа Саша вырӑнти вӑтам шкулта вӗренеҫҫӗ, ҫитӗннӗ хӗр Мария - манӑн пӗрремӗш пулăшакан. Мăшăрăм Алексей Александрович кустӑрмаллă тракторпа ӗҫлет.
Татьяна Райко 2000 ҫулта Хушăлка вӑтам шкулне пӗтернӗ. Унтан Пишпӳлекри 149№ професси паракан училищĕре кондитер-повара вӗренсе тухнӑ. Повар ӗҫӗ уншӑн сезон ӗҫӗ кӑна, вӑл ҫуркуннерен пуҫласа уй-хир ӗҫӗсене пӗтериччен пырать. Унӑн тӗп ĕç вырӑнӗ вара ялти Культура çуртӗнче, вăл - техника персоналӗ.
- Ĕççи пынă чухне пĕрремĕшпе иккĕмĕш блюдăсене пĕçеретĕп, - паллаштарать хăй ĕçĕпе Татьяна Петровна. - Паллах ӗнтӗ, салатсем, компотсем тата тӗрлӗрен пылак апатсем те хатӗрлетӗп. Апат-ҫимӗҫе вырӑнти лавккаран, аш-какайне хуçалăхран илетпĕр. Хатӗрленĕ май яланах хам ăшра юрлатӑп. Ҫакна мана анне вӗрентнӗ.
Владимир СМОЛОВ.
Пишпÿлек районĕ.