Каменщика вĕреннĕ, комбайнер пулса тăнă

Опытлă комбайнер сăмахĕсем тăрăх, кашни вырма тĕрлĕрен иртет: чылай чухне çанталăкран, культурăсем çитĕнсе çитнипе çитменнинчен килет. Техникăна вара çĕр ĕçченĕ хăй хатĕрлет – кирек мĕнле профессионал пекех ăна юсама пĕлет, хăйĕн комбайнĕпе типтерлĕ усă курать.
– Вуннăра чухнех аттене (вăл та комбайнер пулнă) уй-хирте пулăшаттăм. Хăнăхнă тата юратнă ĕç. Кунта, анасем çинче, хăйне евĕрлĕ хутлăх, урăхла сывлатăн, – тет çĕр ĕçченĕ. – Уйрăмах çăкăр пуçтарма юрататăп. Мĕншĕн тесен вăл – савăнăç кÿрекен, ыранхи кунра шанчăклăх паракан чылай çын ĕçĕн тухăçĕ.
Леонид Васильев шкул сакки хыççăн Ĕпхÿ хулинчи 5№ професси училищинче каменщик-монтажник профессине алла илнĕ. Хулари пĕр заводра та ĕçлесе пăхнă, анчах чунĕ тăван ялах туртнă. Çапла пулнишĕн арçын пĕрре те ÿкĕнмест. «Ăçта çуралнă – çавăнта кирлĕ пулнă» тесе ахальтен каламаççĕ-тĕр. Çакă кашни çын хулана парăнмалла тенине пĕлтермест, тăван çĕр çинче те ырă ĕçсем тума, çынсене савăнтарма пулать иккенне çирĕплетсе парать.
Ирида МАТНИЯЗОВА.
Иглин районĕ, Чăваш-Кăпавĕ ялĕ.