Чи лайăх наставниксен шутĕнче

Компанийĕн вунă территори сечĕн производство пĕрлешĕвĕсен чи лайăх наставникĕсен шутĕнче – Пелепей районĕнчи «Белебеевские электрические сети» электричество сечĕн производство пĕрлешĕвĕн тĕп инженерĕ Николай Родионов.
Николай Алексеевич Пишпÿлек тăрăхĕнчи Мелеспуç ялĕнче çуралса ÿснĕ. Пелепей хулинчи ял хуçалăх техникумĕнче, Пушкăрт патшалăх аграри университетĕнче ятарлă пĕлÿ илнĕ. Ĕçлĕ пурнăçне электромонтертан пуçланă, 2002 çултан мастер тивĕçĕсене пурнăçланă, 2019 çултан районти электричество сечĕн тĕп инженерĕ пулса ĕçлет. Хăй тивĕçĕсене тÿрĕ кăмăлпа пурнăçланăшăн ăна пĕр хутчен çеç мар район, республика шайĕнчи Хисеп хучĕсемпе чысланă. Иртнĕ çул вĕçĕнче «Пысăк професси ăсталăхĕшĕн тата лайăх ĕçленĕшĕн» ПР Промышленность, энергетика тата инноваци министерствин Хисеп хутне тивĕçнĕ.
– Çамрăк специалистсене профессийĕн тĕп хăнăхăвĕсене вĕрентетпĕр, йышăнакан должноçĕсене кура производство тĕллевĕсене хăйсем тĕллĕн тата пахалăхлă пурнăçлама, корпоративлă культурăна хăнăхтаратпăр. Хăй вăхăтĕнче пирĕн наставниксем çамрăксене пурнăç тата професси опычĕпе сахал мар паллаштарнă. Халĕ çак роле пурнăçлама пире вăхăт çитрĕ, – тет Николай Родионов.
Çамрăксене вĕрентесси «Башкирэнерго» тулли мар яваплăхлă пĕрлĕхĕн кадрсемпе ĕçлекен политикин тĕп пайĕ шутланать тата ăна аталантарас ĕçре лайăх кăтартусем тăвать.
Римма СУЛТАНОВА.
Пелепей районĕ.