Пысăк çул пĕрремĕш утăмран пуçланать

Ирина Михайловна Антонова «Федераллă пассажир компанийĕ» акционерлă пĕрлĕхĕн Куйбышев филиалĕн Ĕпхÿри уйрăмĕнче 16 çул ĕçлет. Вăл 1975 çулхи январь уйăхĕн 2-мĕшĕнче Авăркас районĕнчи Меселпуç ялĕнче нумай ачаллă çемьере тăваттăмĕш ача пулса çуралнă. Вырăнти вăтам шкултан вĕренсе тухнă хыççăн Ĕпхÿ хулинчи училищĕре хими анализĕн лаборанчĕ, унтан Çтерлĕ хулинчи училищĕре вязальщица профессийĕсене алла илнĕ. Анчах та пурнăçра вĕсемпе усă курма тÿр килмен.
1996 çулта Таштамакра пурăнакан Александр Антонова качча кайнă хыççăн Ирина колхозри столовăйĕнче повар пулăшаканĕ пулса ĕçлеме тытăннă. Часах çамрăк мăшăрăн Дима ятлă ывăлĕ çуралнă. Шел пулин те, Антоновсен мăшăрлă пурнăçĕ вăраха пыман, çемье пуçĕ Александр çул-йĕр çинчи инкеке пула çамрăклах пурнăçран уйрăлса кайнă. Ирина вара никампа та шăпине тĕрĕслесе пăхма килĕшмен. «Саша пек арçынна тек тĕл пулаймарăм пулĕ», – терĕ вăл ассăн сывласа.
– Ирина, мĕнле майпа чугун çул çине ĕçлеме лекнĕ-ха эсир?
– Пĕр вăхăт уйрăм предприниматель патĕнче пекарьнăра ĕçлерĕм, унтан «Рощинский аш-какай комбиначĕн» кăлпасси цехĕнче хуралçă пулса тăрăшрăм. Çавăн чухне пĕр ĕçтеш проводница пулма сĕнчĕ. Унăн хĕрĕ чугун çул çинче ĕçлетчĕ. Ман телее, çав вăхăтра проводницăсен наборĕ пыратчĕ, медосмотр иртрĕм те кирлĕ документсем пухса çĕнĕ ĕçе вырнаçрăм. Чугун çул çинче 2009 çултан тăрăшатăп.
– Сирĕн çул çÿревре темиçе кун та пулма тÿр килет, рейса кайсан килте ывăлăра кампа хăвараттăрчĕ?
– Çапла, малтан ĕçре 4-5 кун пулаттăм, халĕ рейсран çаврăнса таврăниччен 9-10 кун иртет. Лайăхрах ĕç укçи ĕçлесе илес тесе вăхăтлăха ачапа уйрăлма тиветчĕ. Дима ун чухне 10 çул тултарнăччĕ, ăна шанчăклă çынпа, кукашшĕпе, хăвараттăм.
– Мĕнле маршрутпа çÿреме тÿр килнĕ сирĕн чугун çулпа?
– Маршрут Çурçĕрти Нижневартовск, Уренгой, Санкт-Петербургпа Мускав хулисене выртатчĕ. Халĕ 358№ икĕ хутлă купе поезчĕпе Ĕпхÿ – Имеретинский курорт – Мускав маршрутпа çÿретпĕр.
– Килĕшет-и сире хăвăр ĕçĕр? Мĕнпе?
– Паллах, хам çак профессие суйласа илнишĕн пĕрре те ÿкĕнместĕп. Халĕ икĕ хутлă поезд çинче ĕçлеме пуçланăранпа ĕç самай çăмăлланчĕ. Пĕр хутлă поездра ĕçленĕ чух электричество çук вырăнта вакунсене кăмрăкпа ăшăтма тÿр килетчĕ. Халĕ çĕнĕ поездсенче климат-контроль функци пур. Сивĕ пулсан ăшăтса, шăрăхра кондиционерсем хускатса пулать. Çул çÿревре пулма юрататăп. Уйрăмах Олим вăййисем иртнĕ Адлер хули çывăхĕнчен, Волгоград хулинчи аякран курăнакан Мамай курганĕ çинчи «Тăван çĕршыв-анне чĕнет» палăк умĕнчен иртсе кайма кăмăллă. Вăрахрах килте ларсан, чун çула тухма чĕнет.
– Вакунра йĕркене пăсакансем, ÿсĕрсем пулсан мĕн тăватăр?
– Пирĕн ÿсĕр пассажирсене поезда лартмасса ирĕк пур. Пассажирсен правилисем тăрăх çул çинче спирт шĕвекĕсем ĕçме, пирус туртма юрамасть. Çын çул çинче ĕçсе ÿсĕрĕлнĕ пулсан малтан унпа калаçатпăр, выртса çывăрма, юнашар пассажирсене кансĕрлемессе ÿкĕтлетпĕр. Ӳкĕте кĕменнисене хăрушсăрлăх служби ирĕксĕрлесе çитес станцинче антарни те пулать.
– Сирĕн вакунра паллă çынсемпе тĕл пуласси пулкаланă-и?
– Пулнă. Çапла пĕрре Сергей Глушко актер, ташăçă хăйĕн ушкăнĕпе Саранск хулинче эпĕ ĕçлекен вакуна ларнăччĕ. Кино тата телевидени актрисине Ольга Картункована, РФ халăх артистне Олег Газманов юрăçа та тĕл пулма шăпа пÿрнĕччĕ. Паллă çынсем икĕ вырăнлă пысăк комфортлă хушма пулăшу паракан вакунсене вырнаçаççĕ. Пассажирсем май пур чух вĕсемпе фото ÿкме, автограф илме васкаççĕ.
– Ирина Михайловна, кам кĕтет сире килте?
– Эпĕ Çтерлĕ хулинче пĕччен пурăнатăп. Ывăл çар çынни, офицер, Инçет Хĕвел тухăçĕнче хĕсметре тăрать. Тăван ялта мана 86 çулхи атте кĕтет. Çавăн патне час-часах пулăшма çÿретĕп.
– Тавтапуç, Ирина Михайловна, хăвăр ĕçĕрпе паллаштарнăшăн. Çирĕп сывлăх сире, такăр çул, интереслĕ тĕлпулусемпе ăнлануллă та сăпайлă пассажирсем сунатпăр.
Инга АЛЕКСЕЕВА.
Çтерлĕ хули.