Пурнăçри чăваш наци пуканисем

Çак кун, кашни çулах, Ульяновскри Ача-пăча вулавăшне пулăшу паракан фонд «Пирĕн тымарсем. Фольклорпа паллашатпăр» («Наши истоки. Читаем фольклор») акци ирттерме палăртса хурать. Çавна кура Пишпÿлекри тĕп библиотекăн чăваш халăхĕпе ĕçлекен уйрăмри чăваш чĕлхипе культурине юратакансен «Салампи» клуб пайташĕсем кăçал тăваттăмĕш хут акцине хутшăнса «Тĕрлĕ наци пуканисем» ятлă мероприяти ирттерчĕç. Уйрăмах чăвашсен «Йăрăх» пукани çинчен тĕплĕн сăмах пычĕ. Çак йĕркесен авторĕ мероприятине хутшăннă шкул ачисемпе клуб хастарĕсене тĕрлĕ халăхсен кил-çуртри çынсен сывлăхне сыхлакан пуканесем (куклы-обереги) çинчен каласа пачĕ. Чăваш халăхĕн те çакăн пек пукане (Йăрăх) пур. Унăн историйĕ те питĕ кăткăс, вăрăм. Чăваш ачисене итлесе ларма та‚ пуканине алла тытса пăхма та питĕ интереслĕ пулчĕ. Кĕнекесене комплектлакан пай ертÿçи Люся Исаева библиотека килнĕ фольклор кĕнекисемпе паллаштарчĕ.

Пишпÿлекри 1№ вăтам шкулта технологи урокĕсене илсе пыракан Олеся Андреева пухăннисемпе мастер-класс ирттерсе «Уйрăлман туссем» («Неразлучники») пуканесем тума вĕрентрĕ. Сĕтел хушшинче хаваслă та хĕрÿ алă ĕçĕ пуçланчĕ. Пĕрремĕш хут хăйсен аллипе пукане тăвакансен тăтăшах ыйтусем çуралчĕç. Ăсталăх класне ертсе пыракан пултаруллă педагог мероприятие хутшăнакансене пулăшнă май, çак «неразлучники» пуканесем çинчен чылай интереслине каласа пачĕ. Савăнăçлă та туслă лару-тăрура култаракансем те‚ юрă юрлакансем те пулчĕç. Эпĕ те çак самантпа усă курса‚ февраль уйăхĕн пуçламăшĕнче «Унăн сăввисенче вилĕмсĕрлĕх» сăвăçăсен интернет-конкурсне хутшăнса Фатых Каримăн сăввисене чăвашла вуласа çĕнтернисене Тав хучĕсемпе чысларăм. Сĕтел хушшинче чей ĕçме ларсан пухăннисем «Салампи» клубăн сумлă пайташне (вăл клуба йĕркеленĕренпех хутшăнать) Юлия Павлована 80 çул тултарнă ятпа саламларĕç, ырлăх-сывлăх‚ вăрăм ĕмĕр сунчĕç.

Надежда ТАРАСОВА.

Пишпÿлек районĕ.