Пур хыпар та
САЛАМЛАНИСЕМ
10 Нарӑсӑн 2021, 12:10

Николай Михайлович ЕФИМОВ

Çтерлĕ районĕнчи Ямансас (Ишпарсово) ялĕнче çуралса ÿснĕ, паянхи кун Çтерлĕ хулинче кун кунлакан Николай Михайлович ЕФИМОВА, Тăван çĕршывăн Аслă вăрçин тата педагогика ĕçĕн ветеранне 100 çулхи юбилей ячĕпе хĕрÿллĕн саламлатпăр!

100 çул сахал-и вăл, нумай-и? Паллах, нумай. Кашни çыннах ун чухлĕ пурăнма пÿрмен. Çак халиччен курман пысăк йывăрлăх вуншар миллион çын пурнăçне татнă. Çапах та çĕр-шывăмăра хÿтĕлеме ватти-вĕттипех кар! тăнă пирĕн халăх пĕтĕçÿлĕхпе çирĕп кăмăл, паттăрлăх тата Тăван çĕршыва чунтан юратни кирек мĕнле тăшмана та çĕнтерме пулăшнине ĕнентермелле кăтартса панă. Вĕсенчен пĕри - пирĕн сумлă юбиляр! Николай Михайловича чунтан çĕр йăтайми ырă, ăшă сăмахсем, çирĕп сывлăх, ырлăхпа телей, çĕкленÿллĕ кăмăл-туйăм тата вăрăм кун-çул, ачисен тата мăнукĕсен, мăнукĕсен ачисен юратăвне туйма сунатпăр!
Çĕре çити тайма пуç сире, çамрăк ăруран! Вăрçăри паттăрлăхшăн тата мирлĕ пурнăçри ырми-канми ĕçĕршĕн чунтан тав тунине йышăнсамăр.
Юбилей ячĕпе!
Пушкăрт Республикинчи Чăвашсен пĕрлешĕвĕ,
Çтерлĕри чăвашсен наципе культура автономийĕ.