Паттăрпа тĕл пулни ĕмĕр асра юлĕ

Çак кунсенче кунта Мияки районĕнчи Çĕнĕ Хурамал шкулĕнчи Александр Леонтьев, Сергей Иванов, Ксения Кириллова, Татьяна Павлова вĕренекенсем пулнă. Вĕсемпе пĕрле ял хутлăхĕн пуçлăхĕ Иван Павлов та вырăна килсе çитнĕ. Ачасем аэрокосмос шкулĕнче пулнă май кунти пурнăç йĕркисемпе, космос тата авиаци тĕнчипе паллашнă. Çавăн пекех «Никама та манман, нимĕн те манăçман» митинга хутшăннă.
– Шăпах çак митингра Тăван çĕршывăн Аслă вăрçинче хыпарсăр çухалнă пирĕн ентеш Тимофей Дмитриевич Петров ÿтне шыравçăсем тупни çинчен калакан документа пире пачĕç. Ăна чылай вăхăт шыранă, халĕ эпир паттăр салтака ăçта пытарнине пĕлетпĕр. Унăн ÿчĕ Ленинград облаçĕнчи Шумск районĕнчи Ильмень ялĕнчи çĕр çинче канлĕх тупнă, – каласа парать Иван Владимирович.
Сăмах май, Тимофей Петров Пушкăртстанри чăвашсен наципе культура автономи председателĕн Виталий Викторов медицина наукисен докторĕн кукашшĕ пулнă. Çавăнпа та «Никама та манман, нимĕн те манăçман» митинга Виталий Васильевич хăй те хутшăннă. Унсăр пуçне тĕлпулăва унăн пиччĕшĕ Валерий Васильевич Людмила Николаевна мăшăрĕпе тата Илья мăнукĕпе килсе çитнĕ.
Мияки районĕнчен килнĕ шкул ачисемшĕн аэрокосмос шкулĕнчи асра юлмалли самантсенчен пĕри вăл – Раççей Геройĕпе Николай Гаврилов генерал-лейтенантпа тĕл пулни. Вĕсем асăнмалăх паттăрпа сăн ÿкерчĕк тума та май тупнă. Çапла майпа çамрăк ăру хăйсен пурнăçĕнчи автобиографи йĕркисене пуянлатнă.
Юрий СНЕГОПАД.
Давлекан районĕ,
Калиновка ялĕ.