Манăн тăван ялăм!

Тăван çĕршыв вăл – чунтан юратнă аттепе анне, асаттепе асанне, кукаçипе кукамай, аппапа пичче, шăллăмпа йăмăк, ытарайми кÿршĕсем, илемлĕ тавралăх, аслă та чаплă урам, туслă ял-йыш. Аттепе аннерен хаклă çын пур-ши тĕнчере? Çук! Эпĕ анне кăкăрне ĕмсе ÿснĕ. Атте мана пĕрремĕш сăмахсене калама, икĕ алăран тытса пĕрремĕш утăмсене тума, ваттисене хисеплеме, çут тĕнчене юратма, упрама, ĕçчен пулма вĕрентнĕ.
Ялти чи тăрă çăл куçран шыв ăсса килсе асанне мана шыва кĕртнĕ. Асатте вара пÿрт умĕнчи çĕмĕртĕн шур çеçкипе киленме, шăнкăрчсен юррине итлеме, чăх-чĕпсене, хур-кăвакалсене, выльăх-чĕрлĕх пăхма хăнăхтарнă.
Кукамай тутлă кукăльпе, пашалупа, çуллă икерчĕпе, турăхпа, юрма янă яшкапа хăналать. Çемçе мамăкран ăшă нускисем, алсишсем çыхса парать. Анлă та аслă хирсенче кĕтÿ кĕтнĕ чух кукаçи юмахсем, пурнăçра чăн пулса иртнисем çинчен каласа панине эпĕ хăлха тăратса, çăвара карсах итлесе ларатăп. Пылак пулман кукаçин ачалăхĕ. Вăл хăйĕн ашшĕне курман, ашшĕ вара ывăлĕ çуралнине те пĕлеймен. Мăн кукаçи хаяр çапăçу хирĕнче тăшманпа кĕрешсе пуçне хунă. Пирĕн ăруран кăна Тăван çĕршывăн Аслă вăрçинче темиçе теçетке вăй питти арçын вилнĕ.
Яштака пÿллĕ, илемлĕ сăн-питлĕ, ырă кăмăллă, ĕçчен те пултаруллă Аня аппа пирĕн çурта илем кÿрет. Хура çĕмĕрт куçлă, вăрăм çивĕтлĕ, янăравлă саслă, ялан хаваслă ашкăнчăк Ксюша пире савăнтарать. Владислав пиччепе Ашкатар çырминче пулă тытса çÿрени вара маншăн чи пысăк уяв. Вăл мана кулăшла пăтăрмахсем çинчен каласа парать, юхан шыв хĕрринче асăрхануллă пулмаллине, çут çанталăка сыхлама, юратма вĕрентет.
Ытарайми кÿршĕсем – Тоня аппапа Петя пичче, Света аппапа Николай пичче. Пирĕн ял ĕçре чапа тухнă çынсемпе пуян. Юлия Васильевна Чекмасова, Нина Васильевна Федорова, Маркс Петрович Максимов, Никифор Иванович Макаров, Валерий Федорович Сальников, Семен Васильевич Русаков орден-медальсене тивĕçнĕ. Çак çынсем çинчен пирĕн шкул вĕрентекенĕ А.М. Вальщикова çапла юрă çырнă:
Пăхма маттур, ĕçре паттăр
Пирĕн ялăн çыннисем.
Нина, Юля, Надиш, Рая
Пирĕн Ĕç геройĕсем.
Ку маншăн Тăван çĕршыв
Шутсăр ялсем, шывсем.
Анчах эпĕ ÿснĕ ялăм,
Ялан ман куç умĕнче.
Пур вăйне хурса ĕçлеççĕ,
Шанса панă ĕçсенче.
Орден-медальсем çунаççĕ,
Вĕсен кăкрисем çинче.
Манăн пысăк Тăван çĕршыв Раççей ятлă. Эпĕ ăна пĕтĕмпе курман-ха. Куçпа пăхса çитереймен, аршăнпа виçеймĕн ăна. Нихăçан та ăна манас, пăрахас çук.
Любовь ЗУБАРЕВА.
Федоровка районĕ, Ашкатар ялĕ.