Пирĕннисем - Эрĕнпурти Чÿклемере

Октябрь уйăхĕн 26-мĕшĕнче Эрĕнпур хулинче иртнĕ Чÿклемене Пушкăртстанри, уйрăмах Куюргазă районĕнчи, икĕ чăваш ансамблĕ хутшăннă. Вĕсем – «Çеçпĕл» фольклор тата «Янрав» вокал ушкăнĕсем.
Çул çÿреве Раççейри федераци шайĕнче наципе культура автономи пайташĕ Владимир Яковлев, Куюргазă районĕнчи обществăлла палатăн председателĕ Эльза Васильева, Кривле-Илюшке ял Канашĕн пуçлăхĕ Игорь Ворошилов йĕркеленĕ.
Уява пухăннисене Раççейри чăвашсен федераци шайĕнчи наципе культура автономин председателĕ Николай Гаврилов видеоçыхăну урлă ăшшăн саламланă. Эрĕнпур облаçĕн вице-губернатор тивĕçĕсене пурнăçлакан – регион тата информаци политикин министрĕ Юрий Мироненко регионти нумай енлĕ культура пĕлтерĕшне, облаçра тĕрлĕ наци çыннисем пурăннине, вĕсем пĕтĕмĕшле историе типтерлĕ упранине палăртнă. Унсăр пуçне Эрĕнпур облаçĕнчи чăвашсен наципе культура автономин президенчĕ Петр Семенов салам сăмахĕсем тухса каланă. Пушкăртстан делегацийĕ ятĕнчен республикăри чăвашсен Канашĕн ертÿçи Ирина Сухарева, Пелепей тăрăхĕнчи ЧНКА пуçлăхĕ Владимир Яковлев сăмах илнĕ. Кунтах Анатолий Ефремов чăваш хастарĕ «Чăваш тĕнчи» курав йĕркеленине те палăртма кăмăллă.
Чÿклеме уявне Эрĕнпурпа Челябинск, Чĕмпĕр облаçĕсен, Чăваш тата Пушкăртстан республикисен пултарулăх ушкăнĕсен юрри-ташшисем илем кÿнĕ. Унсăр пуçне йĕркелÿçĕсем ярмаркка тата наци апачĕсен куравне йĕркеленĕ.
Ирида НОВИКОВА. Эрĕнпур хули.