Профессионалсем кирлĕ

Хамăр тăрăха Пишпÿлек районне илес пулсан, пит мухтанмаллиех çук ку енĕпе. Уйрăмах музыкантсем çитменни чăрмантарать. Паллă ĕнтĕ, музыкантсăр фольклор ушкăнне те пуçтараймастăн, уява та уяв пек ирттерейместĕн. Пирĕн шухăшпа, ялти культура пурнăçне вăй-хăват кĕртес тесен, профессионалсем çине таянмалла, вĕсем çук пулсан, вĕсене пăхса çитĕнтермелле. Калăпăр, мĕншĕн районти культура пайĕн ĕçченĕсен фольклор ушкăнĕсене ертсе пыракансемпе ятарлă вĕренÿ йĕркелес мар? Культура ĕçченĕсемпе йĕркеленĕ çавнашкал вĕренÿ тĕрлĕрен тĕлпулу каçĕсемпе вăйăсем ирттерес ĕçре те пысăк пулăшу кÿнĕ пулĕччĕ.
Калăпăр, «Пĕрре курсах саврăм-ши?» евĕр конкурссем мĕнле çамрăк кăмăлне каймĕç? Вĕсем хаваспах хутшăнаççĕ унашкал конкурссене, йĕркелекенсем çеç кирлĕ.
Чылай чухне вара çавнашкал кăсăк самантсене ирттерме пĕлекен çын çукки палăрать. Çавăнпа та пирĕн сĕнĕве Пишпÿлек районĕн культура пайĕн ĕçченĕсем шута илессе шанас килет.
Н. СЕМЕНОВА. Пишпÿлек тăрăхĕ.
«Урал сасси», 1996 çул.