Наци кăларăмĕсен малашлăхĕ

Мероприяти пуçламăшне чăваш гимназин «Эткер» медиацентр хатĕрленĕ видео, ачасен сăввисем, юрри-ташши, фойере йĕркеленĕ алă ĕçĕсен тата хаçат историне халалланă курав илемлетрĕ. Тĕлпулăва Аделина Горяевапа Владислав Сухарев вĕренекенсем чăвашла тата вырăсла ертсе пычĕç. Вĕрентекенсемпе ачасем, гимнази директорĕ Фидалия Молчанова тăрăшнипе мероприяти çÿллĕ шайра иртрĕ.
Хаçатăн тĕп редакторĕ Юрий Михайлов «Чăваш кăларăмĕсен малашлăхĕ» çавра сĕтелĕн темине пĕлтернĕ хыççăн президиумри çынсене суйларĕç. Вĕсем Чĕмпĕр облаçĕнчи чăвашсен «Канаш» хаçачĕн тĕп редакторĕ Елена Мустаева, Чăваш Ен Пуçлăхĕн администрацийĕн хут ĕçĕсемпе ĕçлекен управлени консультанчĕ Валерий Петров, Пелепейри чăваш наципе культура автономийĕн председателĕ Владимир Яковлев пулчĕç.
Юрий Николаевич сăмаха пуçланă май хаçат хальхи вăхăтпа пĕр тан утни, унăн сайчĕ, ВКонтакте, Одноклассни социаллă сетьсенче ятарлă страницисем пуррине, нумай пулмасть Телеграм каналпа ĕçленине пĕлтерчĕ. Йывăрлăхсем, хаçат тиражĕ пирки сăмах хускатрĕ. Кăларăмăн штатра тăман корреспонденчĕсене, çырăнтару вăхăтĕнче пысăк пулăшу паракан Ирина Ильинапа Наталья Емельянована, Людмила Маркинана палăртрĕ.
– Вулакан куçĕ вăл çивĕчрех. Эсир эпир курман самантсене асăрхатăр. Сирĕн çырăвăрсем, материалăрсем вулакан патне çывăх, ăнланмалла чĕлхепе çырăннă. Социаллă сетьсенче вулакансем çырнă комментарисене вулама кăмăллă. Çынсем хаçатпа интересленни, материалсене вулани кăмăла çĕклет, малалла ĕçлеме вăй парать. Паян эпир хаçатăн улттăмĕш юбилейне паллă тăватпăр. Нумай çул пыракан ĕçлĕ çыхăну малалла тăсăласса шанатăп, – тав туса каларĕ хаçатăн тĕп редакторĕ.
Валерий Петров 1991-2005 çулсенче «Урал сассинче» яваплă секретарь, Пелепей районĕнчи чăваш культура обществин председателĕ пулса ĕçленĕ самантсене аса илчĕ. Пушкăртстан çĕрĕ вĕсемшĕн хаклă та çывăх пулнине пĕлтерчĕ. Хаçат пичет хатĕрĕ çеç мар, йĕркелÿçĕ пулнине те палăртрĕ. Чăваш гимназине уçас ĕçре пĕрле тăрăшнине аса илчĕ, гимназие халалланă «Йыхрав» сăввине (вăл унăн «Чун ăшши» кĕнекине кĕнĕ) вуласа пачĕ.
Елена Мустаева салам сăмахĕ каланă май хăйсен редакцийĕнчи ĕç-хĕлĕ, йывăрлăхĕсем пирки сăмах хускатрĕ. Нушисем пирĕн пĕрешкелех килсе тухаççĕ иккен. Почта уйрăмĕсем хупăнни, çырăнтарупа начар ĕçлени, чăваш чĕлхи урокĕсене кĕскетни вĕсемшĕн те çывăх.
– Сирĕн йышра штатра тăман общество корреспонденчĕсен шучĕ йышланса пытăр, хăйсен хайлавĕсемпе хаçат страницисене пуянлатчăр, илемлетчĕр. Паллах, паянхи кун хут çинче тухакан пичет кăларăмĕсене çăмăл мар. Почта хăйĕн тивĕçне кирлĕ пек пурнăçламаннипе сире альтернативлă çырăнтарупа ĕçлеме сĕнесшĕн. Тата кашни вулакан хăйне хаçат çырăннисĕр пуçне тăван-пĕлĕшне те çырăнса парсан тираж шучĕ ÿсмеллех, – пĕтĕмлетсе каларĕ Елена Николаевна.
Владимир Яковлев хаçат тусĕсене тав турĕ.
– Хаçат пире çывăхлатать, туслаштарать, пĕр тĕвве пухать. Пур чăваш мероприятийĕсем пирки эпир хаçатран пĕлсе тăратпăр. Вăл нумай ыйтăва татса пама пулăшать, – терĕ вăл саламласа.
Çавăн пекех Владимир Матвеевич вулакансене, çамрăксене социаллă сетьсенче хаçатпа ытларах çыхăну тытма сĕнчĕ.
Хаçат тиражне ÿстерес, ачасене чăвашла калаçма вĕрентес ыйтупа Лидия Мавлютова (Пелепей районĕ) хаçатра ачасене халалланă рубрика уçма сĕнчĕ, материалсене ярса пама та шантарчĕ. Зоя Колесникова (Ермеккей районĕ) шкулта чăваш чĕлхи урокĕсенче хаçат материалĕсемпе хăй усă курни çинчен аса илчĕ, çемьери опытпа паллаштарчĕ. Вăл хулара пурăнакан мăнукĕсемпе чăвашла калаçать иккен.
Салам сăмахĕсем каланă май Наталья Емельянова хаçат тусĕ, Геннадий Челпир РФ Писательсен сюзĕн пайташĕ, Лидия Мавлютова, Мелания Никифорова, Нина Алексеевна, Алексей Емельянов, Людмила Маркина, Рудольф Павлов сăмах ăстисем «Урал сасси» хаçата халалланă сăввисене вуласа пачĕç. Вĕсене çывăх вăхăтра хаçатра пичетлесе кăларăпăр.
Канашлăва Ĕпхÿ наукăпа технологисен университечĕн преподавателĕ Лира Афанасьевапа Константин Петров тата Ольга Никитина студентсем килсе çитни савăнтарчĕ. Хастар çамрăксем «Урал сассипе» тачă çывхăну тытаççĕ, хаçат йĕркелекен конкурссене хутшăнаççĕ. Вĕсен ырă тĕслĕхне çамрăк ăру ăша хывасса шанатпăр.
Çавра сĕтеле вĕçленĕ май Юрий Николаевич тав туса хаçат тусĕсене юбилей тĕлне туса кăларнă сувенирсем, Тав çырăвĕсем парса чысларĕ.
Инга АЛЕКСЕЕВА.
Пелепей хули.