Мускав хулинче ЮНЕСКОн Пĕтĕм тĕнчери поэзи кунĕ иртрĕ

Унта Раççей регионĕсенчи тата ют çĕршывсенчи поэтсем, литераторсемпе поэзие юратакансем пуçтарăнчĕç. Пĕтĕм тĕнчери поэзи марафонĕ Мускаври Литераторсен тĕп çуртĕнче иртрĕ. Ăна Евразипе Африка халăхĕсен ассамблейи пулăшнипе Пĕтĕм тĕнчери çыравçăсен пĕрлĕхĕ йĕркеленĕ.
Йĕркелÿçĕсем Аслă Çĕнтерĕве 80 çул çитнине халалласа «Шăплăх минучĕ: эпир – пĕр планета çыннисем» тĕлĕнмелле поэзи флешмобĕ ирттерчĕç.
Утмăл çеккунт хушшинче 300 çын пĕр вăхăтрах 30 чĕлхепе мир çинчен 100 сăвă вуларĕç, тăнăçлăхшăн тата халăхсен пĕрлĕхĕшĕн сасăсен уйрăм симфонине йĕркелерĕç. Мероприятие Чăваш Республикинчен Чăваш Ен патшалăх премийĕн лауреачĕ, ЧР искусствăсен тава тивĕçлĕ деятелĕ, паллă поэтесса тата тележурналист, сценарист, драматург Мария Карягина килсе çитрĕ.
Флешмоб Пĕтĕм тĕнчери Рекордсен кĕнекине кĕнĕ. Пĕтĕм тĕнчери писательсен пĕрлĕхне йĕркеленĕ Маргарита Аль поэзие юратакансене флешмобсене, вырăнти çавăн евĕрлĕ мероприятисене хутшăнма сĕнчĕ. Çакăн йышши мероприятисем пирĕн тĕнчене ырăрах та илемлĕрех туни куçкĕретех. Сĕнÿ питĕ лайăх, ăна чăваш поэзийĕн классикĕ К.В. Ивановăн 135 çулхи юбилейне те халаллама пулать.
Татьяна БАЛКОНСКАЯ.
Мускав хули.