Вĕренекенсем «Манăн наци апачĕ» флешмоба хутшăннă

Унăн тĕп тĕллевĕ вĕренекенсенче кулинари ăсталăхне аталантарас тĕлĕшпе апатлану культурин никĕсне хывасси, шкул поварĕ профессин сумне ÿстересси, наци кухнин уйрăмлăхĕсемпе паллаштарасси пулса тăрать.

Наци кухни тата наци апачĕ – темиçе ĕмĕр йĕркеленнĕ йăла-йĕркесем. Кашни çын мĕнпур вăрттăнлăха сыхласа хăварса тата вĕсене ăруран ăрăва куçарса пырса типтерлĕ упрама тăрăшать.

Çакна асра тытса Авăркас тăрăхĕнчи Чăваш Хурамал ялĕнчи В.В. Николаев ячĕллĕ шкулта 8-мĕш класра вĕренекенсем хăйсен класс ертÿçипе Н.Л. Умовапа шкулти шеф-повар В.Х. Павлова йĕркеленĕ мастер-класа хутшăннă.  Пуçтарăннисем чăваш наци апачĕ – кукăль – пĕçернĕ. Пĕçернĕ кăна мар, тутлă кукăльпе сăйланнă та. Ачасен сăмахĕсем тăрăх, мастер-класс тухăçлă иртнĕ. Сăмах май çакна та палăртса хăвармалла: наци апатне пĕçерме усă курнă апат-çимĕç санитарипе гигиена нормисем ыйтнине тивĕçтернĕ.