Шуршăл паттăрĕ

Чăваш çĕрĕ те пăхса ÿстернĕ,
Пиллесе çут çуллă кун-çула.
Ашшĕ-амăш çирĕп çитĕнтернĕ,
Пилĕ çитнĕ харсăр паттăра.

– Çывăрма выртсан –
ĕмĕтленеттĕм,
Куç хупмасăр шухăша кайса.
Çутă ĕмĕтпе эп хĕмленеттĕм –
Вăранса каяттăм савăнса…

Чунăм ыйтнипе «хурçа» ĕнентĕм,
Шантăм пĕчĕкрен ĕмĕтĕме.
Тăрăшсах чунтан – вĕçме
вĕрентĕм,
Сăмаха эп тытрăм, пилĕме.

Ĕмĕтĕм ман чăнлăхпа тÿр килчĕ,
Тур та пулăшрĕ пуль, тен, туйса…
Анне пилĕ маншăн тĕпре пулчĕ,
Чăваш чысĕ пычĕ пулăшса.

Вăхăт çитрĕ – хумхану саманчĕ…
Кĕмĕл хурçă – манăн аллăмра.
Сывлăша çурса çул-йĕр хăварчĕ,
Вĕçсĕр-хĕрсĕр уçлăх çеç умра…

Кĕмĕл уйăх умĕнче тăратăп
Сăнаса эп халь Çĕр-Аннене.
Ал тупанĕ пек ăна куратăп,
Юратса пăхатăп тĕнчене.

Уйăх аркинчен вĕçсе хăпартăм,
Тухрăм çĕнĕрен сĕм уçлăха.
Хĕвелпе çăлтăрсене ал патăм,
Сунтăм çут телей – малашлăха…

Тĕнче уçлăхĕ вĕçĕ-хĕррисĕр,
Ырă тĕлĕк курнăн туйăнать…
Чăнахах-ши ку?.. Татти-сыпписĕр
Тĕрлĕ шухăш пуçра явăнать.

Аякра тăван килтен-çĕртен те,
Атте-аннерен те, халăхран.
Шухăш-кăмăл, чунăмпа чĕрем те
Пурпĕрех – Тăван çĕршывăмра!..
Алексей ЕМЕЛЬЯНОВ. Пишпÿлек районĕ, Кистенлĕ ялĕ.