ÇУРКУННЕ

Тÿпери хĕвел те

Савăнса кулать.

Вăш-вăш ăшă çил те

Хĕле хăвалать.

 

Хĕл иртет, çур килет,

Тĕнче çĕнелет.

Хăй патне вăл чĕнет.

Куçа илĕртет.

 

Çурхи шыв юхать ав,

Пăра хускатса.

Сарăлать вăл кал-кал

Çырана ватса.

 

Ăшă çумăр хыçсăн

Аслати автать.

Çурхи çумăр çулçă

Сарма пулăшать.

 

Хăвăрт çурăлаçсĕ

Йывăç кăчкисем.

Шарласа юхаçсĕ

Канаври шывсем.

 

Сип-симĕс калча

Ешерет уйра.

Симĕс ешĕл, вĕл-вĕл

Хăй капăр тумпа.

 

 

 

Кайăксем килеççĕ

Хăйсен çĕршывне.

Йăва çавăраççĕ

Кăларма чĕпне.

 

Кайăк-кĕшĕк сасси

Таврара ян-ян!

Çутă хĕвел ăшши

Пурне те аван.

 

Килсе çитрĕ шăпчăк

Юрă шăратма.

Саспа тулчĕ шăплăх

Чунтан савăнма.

 

Тракторсем ĕçлеççĕ

Кунĕпе хирте.

Касăсем чĕреççĕ

Ирпе çĕрлеччен.

 

Ту çинче выляççĕ

Ача-пăчасем.

Мĕн тери илемлĕ

Çурхи кунĕсем!

 

Юрату хĕлхемĕ

Çунать чĕрере.

Туйăмăн çулăмĕ

Пырать ĕмĕре.

 

 Мелания НИКИФОРОВА.

Мияки районĕ, Кекен ялĕ.