Сирень

Чунтан юрататӑп сирень ҫеҫкине,
Вӑл аса илтерет тахҫан пулнине.
Шухӑшсемпе каллех эп ҫамрӑклӑхра:
Сирен ҫеҫкин ҫыххи халь ман аллӑмра.

Пулчӗҫ тӗлпулусем, ытарайми каҫсем,
Пӗр-пӗрне шанса куҫран пӑхнисем.
Шутларӑм хама эп телейлĕ тесе,
Хамӑн пуласлӑха сана ҫеҫ кӗртсе.

Шӑпа пулчӗ урӑхла, кайрӑн пӑрахса,
Ҫырнине эс тупрӑн урӑх ҫынпала.
Кӗлленсе саланчӗ пирӗн юрату:

Сирень çеçки те туйрĕ - манăн ырату.

Юхрӗҫ шыв евӗрлӗ кунсемпе ҫулсем,
Чунри ыратӑва пусарчӗҫ вӗсем.
Каҫарнӑ тахҫанах, тусӑм эп сана,
Иртнине астӑвать пӗр сирень кӑна.

Шухӑшсемпе каллех эп ҫамрӑклӑхра:
Сирен ҫеҫкин ҫыххи халь ман аллӑмра.

Пахчари сиренӗн кӗрен ҫеҫкине,
Ҫыхӑ туса лартӑп сĕтелĕм çине.

Людмила РОМАНОВА.

Пишпÿлек районĕ, Ситек ялĕ.