Урал сасси
-3 °С
Пӗлӗтлӗ
Пур хыпар та

Ачасен прависене закон хÿтĕлет

Пĕтĕм тĕнчери ачасене хÿтĕлемелли куна çĕр чăмăрĕ çинчи ачасем тĕл пулакан çивĕч ыйтусене татса парас тĕллевпе йĕркеленĕ. Ăна кашни çулах июнь уйăхĕн 1-мĕшĕнче паллă тăваççĕ. Пуçласа ăна 1950 çулта ирттернĕ. 1949 çулхи ноябрь уйăхĕнче вара уява йĕркелесси çинчен калакан йышăнăва Парижра Пĕтĕм тĕнчери хĕрарăмсен демократиллĕ федерацин конгресĕнче çирĕплетнĕ.

Ачасен прависене закон хÿтĕлет
Ачасен прависене закон хÿтĕлет

Раççей Федерацинчи ачасен прависене «Раççей Федерацинчи ача правин тĕп гарантийĕсем» федераллă законпа килĕшÿллĕн хÿтелеççĕ. Ăна 1998 çулхи июль уйăхĕн 24-мĕшĕнче йышăннă.

Паян эпир сире, хаклă вулакансем, пирĕн авторăн, Мелания Никифорован, ачасене халалланă сăввипе паллашма сĕнетпĕр.

Ача - пурнăç чечекĕ

 

Çулла та килсе çитрĕ

Хăйĕн капăр тумĕпе.

Пурне те савăнтарчĕ

Ачасен уявĕпе.

 

Ача – пурнăç чечекĕ,

Эпир унпа телейлĕ.

Ача – çемье илемĕ,

Çавăнпа вăл хÿхĕмлĕ.

 

Пурнăç хÿри пăрăнăç,

Яланах такăр пулмасть.

Ачасемсĕр пурăнăç,

Пĕртте малалла каймасть.

 

Ача пурри – пысăк мул,

Умра телейлĕ кун-çул.

Ачаллă пÿрт – пасар пек,

Ачасăр пÿрт – масар пек.

 

Пĕр ача вăл – ача мар,

Пĕр ача ачаш пулать.

Виç ача та нумай мар,

Ачапча пÿрт тултарать.

 

Пултăр нумайрах ача.

Виç ача – тулли ача,

Пĕр ача – патша валли,

Иккĕмĕш тĕнче валли.

 

Амăш куçĕ умĕнче

Пур ача та чечек пек.

Пĕтĕм ĕмĕр тăршшĕпе

Упрать хăйĕн чĕринче.

 

Ачасен хавас кулли –

Мĕн тери чĕре валли!

Сан çумра ача пурри –

Панă-çке ăна Турри.

 

Пĕтĕм ăшă кăмăлтан

Саламлатăп чĕререн.

Паянхи илемлĕ кун

Килентĕр сăваплă чун.

 

Сар хĕвел ялан пăхтăр,

Ача чунне ăшăттăр.

Илемлĕ çутă çăлтăр

Çĕрле те çул кăтарттăр.

 

Чунăм савнă саркайăк

Савăк юрă шăраттăр.

Пур ача та пĕр танăн

Уявпала савăнтăр.

 

Мелания НИКИФОРОВА.

Мияки районĕ, Кекен ялĕ.

Автор:Юрий Михайлов
Читайте нас: