Уйрăлу сăмахĕ

Уйрăлу сăмахĕ

Сывӑ пул, ытарми ҫут ҫанталӑк,
Тавтапуҫ, сар хӗвеллӗ тӗнче:
Кулянмастӑп, ыр кӑмӑллӑн кайӑп
Ҫил-тӑманлӑ раштав каҫӗнче...

Ҫӗр ҫинче пурӑнма питӗ лайӑх,
Ҫынсемпе савӑнни – чӑн телей.
Тен, хӑшне ҫиллентернӗ – пур айӑп,
Тӳпере ҫылӑхсемшӗн тӳлеп.

Турӑ ҫеҫ тӳррипе пӑхса тухӗ –
Мӗнле пурӑннӑ эс ҫакӑнта?
Аслӑ суд хыҫҫӑн тин паллӑ пулӗ –
Ҫӑтмаха е тӳрех тамӑка?

Шухӑш вӗҫрӗ ҫапах, эпӗ тивӗҫ
Уҫлӑхра юп курса пурӑнма,
Ма тесен, мухтанмастӑп, кашни ӗҫ
Кӑтартать ман ӑса та алла.

Тӑшманран хӑраман – пулнӑ харсӑр,
Лаша пек ӗҫлесен те канман:
Вӑйӑран, пӗр хӗре ӑсатмасӑр,
Тӑмана пек пӗччен таврӑнман.

Чи хитре пикене ҫавӑрттарнӑ, –
Качча илнӗ чӗре савнине,
Мӑшӑрпа чаплӑ ҫурт туса лартнӑ,
Ҫитӗнтернӗ маттур ачасем.

Мӑнуксем те часах пысӑкланӗҫ –
Ҫӗкленет ҫӗн хунав ешерсе.
Ҫамрӑксем пире йӑлт улӑштарӗҫ,
Вӑйлӑлатӗҫ ҫӗршыв тӗрекне.

... Астӑватӑп, вӑрман та ӳстернӗ, –
Юр айне пулчӗҫ пуль йӑмрасем,
Ҫуркунне пурпӗрех симӗсленӗҫ –
Пурнӑҫ чӗртӗ татах ҫут хӗлхем!

Вăрçă пĕттĕр

Стамбулта Раҫҫейпе Украина хушшинче пыракан икӗ енлӗ мирлӗ калаҫусене ырласа.

Кунӗпеле пачах канмасӑр
Сив ҫумӑр вӗтӗрти ҫӑвать:
Ҫынсем пекех мӗн чӑтаймасӑр
Ҫанталӑк хӑй те макӑрать.

Сире ӑсатнӑччӗ асаплӑн,
Уйрӑлнӑҫем чун ҫуннӑран.
Каҫарӑр Турӑ сыхламаншӑн –
Чӗрӗ юлма пӳрмен пулсан.

Яла хур кайӑксем пек килтӗр,
Анчах май ҫук ҫав савӑнма, –
Цинкран «хăпартнă» хӑтлӑ килӗр
Илсе каять халь ҫӑтмаха...

Ылхан кӗтесӗ – Украина,
Виҫ ҫул вӑл леш тӗнче хапхи.
Ӑс-тӑнӗ пӗтнӗ урнӑ йыттӑн –
Зеленский – Анӑҫӑн тарҫи.

Мӗн, кансӗрлерӗ-им Раҫҫейӗм
Хӑв пӗлнӗ пек пуҫтахланма?
Эс хушнипе хурах эшкерӗ
Вилӗм сапать йӗри-тавра.

Ҫапах ним уссӑр тӑрмашаҫҫӗ –
Пире яраймӗҫ авӑра:
Астуччӑр, вырӑс хӗҫ-пӑшалӗ
Ялан хаяррӑн тавӑрать.

Тӑшман ытла ан каппайлантӑр:
Ҫӗршыв лексен хӑрушлӑха,
Чӗрӗлсе тӑрӗ пӗтӗм паттӑр –
Пӗрле ҫӗнтерӗпӗр юта!

Леонид КЕВЕР.
Шупашкар хули.