Пĕрлехи вăйпа çĕнĕ тĕллевсем патне

Ноябрь уйăхĕн 28-мĕшĕнче Пишпÿлек районĕнчи Пăслăк ялĕнче пурăнакансен 2025 çулта Вырăнти пуçарусене пулăшу паракан программăна (ППМИ) хутшăнассипе çыхăннă пĕтĕмлетÿ пухăвĕ иртнĕ. Унта пухăннисем мĕнле ĕç туса ирттерессине, муниципалитетпа ял çыннисем мĕн чухлĕ укçа-тенкĕ хывассине, пуçару ушкăнне суйлассипе çыхăннă ыйтусене сÿтсе явнă.

Пухăва Пăслăк ял хутлăх администраци пуçлăхĕ Юрий Васильев ертсе пынă. Унта 103 çын хутшăннă. Халăх хăй шухăшне уççăн пĕлтернĕ – пĕр саслă пулса «Пушкăртстан Республикин Пишпÿлек районĕнчи Пăслăк ялĕнчи Паттăрсен паркне тирпей-илем кĕртесси» проектшăн сасăланă. Асăннă проекта пурнăçа кĕртме вырăнти депутатсемпе ял хастарĕсенчен тăракан пуçару ушкăнне те суйланă.
Юрий Александрович пухăннисене ППМИ проекчĕсен конкурс йĕрки мĕнле майпа иртни çинчен каласа панă, пуçару ушкăнĕн ял халăхĕнчен укçа-тенкĕ пухма тивнине, граждансене ĕçсем мĕнле шайра пулнине ăнлантарса памаллине тата проект епле пурнăçланнине тĕрĕслемеллине асăрхаттарнă. Çавăн пекех ял хутлăхĕн пуçлăхĕ Пăслăк çыннисене пĕчĕк Тăван çĕршыв шăпишĕн пăшăрханнишĕн тав тунă, вĕсем хастар пулнине, ППМИ-2025 конкурсра çĕнтерессе шаннине те палăртнă.
Пуху хыççăн ял çынисем концерт программине курса киленнĕ. Унта ача сачĕпе шкулăн çамрăк артисчĕсем, хăй пултарулăх ушкăнĕсем хутшăннă. Куракансем кăмăллă юлнă, артистсене тăвăллăн алă çупса тав тунă.
Виталий СЕРГЕЕВ, пуçару ушкăнĕн ертÿçи.
Пишпÿлек районĕ, Пăслăк ялĕ.