Пур хыпар та
Йăла-йĕрке
30 Кӑрлач 2019, 13:12

Килте пĕçернĕ йăва - ырлăх палли

Январь уйăхĕн 17-мĕшĕнче Пелепей хулинчи «Урал Батыр» наци культурисен центрĕнче чăваш обществин центрĕпе (ертÿçи - Марина Денисова) «Илем» чăваш халăх фольклор ансамблĕ (Нина Никитина, аккомпаниаторĕ Владимир Каранкин) Сурхури фольклор уявне ирттернĕ.

Сурхури - ĕлĕкхи чăваш праçникĕ. Йăлана кĕнĕ тăрăх, ăна хĕллехи кун таврăнăшĕ (солнцестояние) вăхăтĕнче‚ кун вăрăмланма тытăнсан ирттернĕ. Каярах çак уяв Раштавпа пĕр килнĕ‚ Кăшарни кунĕччен тăсăлнă.
Сурхури вăхăтĕнче çĕнĕ çулта хуçалăхра ăнăçу‚ çынсен пурнăçĕнче ырлăх-сывлăх хуçалантăр‚ хирти тыр-пул тухăçĕ ăнса пултăр‚ картари выльăх-чĕрлĕх йышĕ ÿстĕр тесе тĕрлĕ йăла-йĕрке ирттернĕ. Паянхи кун та çак паха енсем халăхра упранса юлнă. Çакна «Илем» халăх фольклор ансамблĕ хăйĕн пуян программипе çирĕплетсе панă.
Пултарулăх ушкăнĕн хастарĕсем, илемсем, хăнасене хаваспа кĕтсе илнĕ‚ килте пĕçернĕ йăвапа хăналанă‚ ырлăх-сывлăх сунса юрăсем шăрантарнă. Çавăн пекех çветке юмлани (гадание) ирттернĕ‚ хаваслă чăваш ташшисене ташланă.
Ирида НОВИКОВА.
Пелепей хули.