Мăнкун паллисемпе сăнавсем

* Енчен те Мăнкун кунĕ çанталăк ăшă та çилсĕр, хĕвеллĕ пулсан çу кунĕсем ăшă килĕç, тухăç ăнса пулĕ. Сивĕ те ăмăр кун – çу типĕ килĕ.

* Мăнкун кунĕ сивĕ пулсан тата çичĕ кун сивĕ тăрĕ.

* Мăнкун сĕтелĕ мĕн чухлĕ пуянрах, çулталăк та çавăн пек пуян пулĕ. Çавăнпа та Мăнкун сĕтелĕ пуян пулмалла.

* Авал тулă ăнса пултăр тесе Мăнкун кунĕ пысăк чуччу çинче ярăннă.

* Мăнкун кунĕ çынсене çăмарта тата кулич валеçсе парсан çителĕклĕ те тулăх пурнăç пулать теççĕ.

* Мăнкун кунĕ ватă çынсем çÿçĕсене туранă. Тура çине миçе çÿç пĕрчи лекет, çемьере çавăн чухлĕ мăнук пулать тенĕ.

* Хĕрсем Мăнкун эрнинче пичĕсене хĕрлĕ çăмарта шывĕпе çунă. Шыв çине ылтăн-кĕмĕл эрешсем те янă. Çакă илемлĕ пулма пулăшать тенĕ.

* Мăнкун кунĕ куккук авăтнине илтни мăшăрлă пурнăç телейлĕ пуласса пĕлтернĕ.

* Мăнкун кунĕ ача çураласси пирки ĕмĕтленеççĕ. Йывăр çын пулас тесессĕн пулас ача валли турилкке çине пĕветнĕ çăмартапа кулич лартмалла тенĕ.

* Мăнкун кунĕсенче мăшăрсем Турăран ача ыйтаççĕ, çак кунсенче пĕлĕт алăкĕсем тĕрлĕ ыйтусем валли уçă теççĕ.