Ĕлĕкхи йăласене малалла илемлĕн тăсаççĕ

Ялти чи кăмăллă ĕçсенчен пĕрне хутшăнакансем хаваспах халăх туслăхне сăнлакан ĕçе пуçăннă. Пухăннисем ушкăнсем çине пайланса хур нимин пĕр-пĕр тапхăрне хăй çине илнĕ: пуснă хурсене вĕри шыв ăшне чиксе кăларнă‚ вĕсене çакăн пек «пĕçернĕ». Унтан нимеçĕсем кайăк-кĕшĕкĕн тĕккисене çăлнă. Çапла майпа пухăннă тĕксене сарса типĕтме хунă. Типнĕ хыççăн вĕсене чĕрсе тÿшек-минтер тума пулать-çке. Хĕрарăмсем пÿртри ĕçсене вĕçлесен йышпах хурсене çума кайнă.

Халăх ташшисемпе вăййисем хур нимине хăйне евĕрлĕ уяв сĕмĕ кĕртнĕ. Юрăсем шăрантарса, пĕр-пĕрне интереслĕ пулăмсем каласа парса ĕçленĕрен, ăшă та кăмăллă лару-тăру пулнăран хастарсем ывăннине те туйман.

Мероприятин тĕп пайĕ вĕçленсен нимеçĕсем тутлă хур ашĕпе хăналаннă. Кунта кашнийĕ çак кун валли ятарласа пĕçернĕ килти апата тутанса пăхнă.

Кĕрхи йăла-йĕркепе çыхăннă уяв çынсен çыхăнăвне çирĕплетме, халăх эткерлĕхне тата пуянлăхне сыхласа хăварма пулăшассине, кăмăл-сипет пулăшăвне, пурнăç тĕревне туйса илме май панине тепĕр хут çирĕплетнĕ.

Ирида МАТНИЯЗОВА.
Пелепей районĕ, Кивĕ Сименкке ялĕ.