Ыранхи тухăç паян тунă ĕçрен килет

Асăннă техникăна опытлă механизатора Юрий Семенова шанса панă. Вĕтетнĕ тухăçа комбайн айĕнчен Суккулти выльăх-чĕрлĕх ферми çывăхĕнчи шăтăка КамАЗпа Размик Павлов турттарса тăрать.
Мĕн чухлĕ рейс тунине тата симĕс масса илсе килнине хăй вăхăтĕнче агроном пулса ĕçленĕ Вячеслав Васильев шута илсе пырать. Борис Андреев Т-150 тракторпа сĕтеклĕ апата пусарса тăрать.
– Кăçал кукуруза начар мар çитĕнчĕ. 80 гектартан 950 тонна хыврăмăр. Культура масси лайăх, вăл пиçсе çитнĕ. Кĕрхи тĕш тырăсене те вăхăтра акса хăвартăмăр. Виктор Сафронов Т-150 тракторпа тăпрана вăрлăх хывма хатĕрлерĕ. 155 гектар лаптăк çине кĕрхи ыраш акрăмăр, 100 гектар çине – кĕрхи тулă. Çак ĕçре СЗ-5,4 сеялкăллă МТЗ-80-па Евгений Апанасов тăрăшрĕ. Сеяльщик тивĕçĕсене Евгений Гордеев пурнăçларĕ. Вячеслав Кузьмин ГАЗ-53 автомобильпе вăрлăх турттарса тăчĕ. Çамрăк механизатор Дмитрий Максимов ЗКК-5-пе асăннă лаптăка пусарчĕ. Ака-суха ĕçĕсем вĕçленсен çумăр çурĕ. Çакă вăрлăхсене тухăçлă шăтса тухма тата аталанма май парĕ, – ăнлантарса пачĕ хуçалăх агрономĕ Евгений Антонов.
Татьяна СЕМЕНКО.
Мияки районĕ,
Çĕнĕ Хурамал ялĕ.