Ĕççи – пуриншĕн те яваплă тапхăр

Вячеслав Сергеев ДОН-1500 комбайнпа 96 гектар лаптăк çинчи вырнă ыраша пуçтаратчĕ. Алексей Гордеев бункерти тырра ЗИЛ- 555 машинипе йĕтем çине турттаратчĕ. Вячеслав Захаров оператор тырра ЗАВ-20 урлă кăларать пулсан, тырра склада турттарассине ГАЗ-53 автомашинăпа Петр Дмитриев пурнăçлать.
Хуçалăхра тыр-пул пуçтарассипе пĕрлех фермăри выльăх-чĕрлех валли апат хатĕрлес ĕç те пырать. Александр Яковлев механизатор ПР-145 С агрегат çаклатнă МТЗ-82,1 тракторĕпе тырă йышши культурăсене пуçтарнă анасем çинче улăм преслатчĕ.
Кукуруза ани çинче те ĕç хĕрÿ пыратчĕ. Юрий Семенов выльăх апачĕ пуçтаракан УЭС-280 комбайн çинче ĕçлетчĕ. Вĕтетнĕ симĕс массăна Суккулти сĕт-çу ферми çывăхĕнчи траншейăна КамАЗ автомашинăсемпе Рамзик Павловпа Петр Викторов турттараççĕ.
– Хуçалăхри çĕр ĕçченĕсем акса ÿстернĕ тыр-пула пухса илес, ял-хуçалăх ĕçĕсене вăхăтлă вĕçлес, выльăх апачĕ хатĕрлесе ĕлкĕрес тесе пĕтĕм вăйран тăрăшаççĕ. Александр Яковлев маларах утă хатĕрлес ĕçре вăй хучĕ, хальхи вăхăтра улăм преслать. Тырă йышши культурăсене вырса пуçтарнă. Виталий Захаров Полесье КЗС-7 çулакан хатĕрпе, Константин Викторовпа Вячеслав Сергеев ДОН-1500 комбайнпа çулнă тыр-пула пуçтарчĕç. Халĕ силос хывас ĕç пырать. Кăçал кукурузăн тухăçĕ гектар пуçне 500 центнерпа танлашать. Паянхи кун тĕлне 250 тонна симĕс масса хывнă. Кĕрхи культурăсене акас ĕçе вĕçлерĕмĕр. Ку ĕçе Денис Максимов пурнăçларĕ. Ыраша тата тулла ГАЗ-53 автомашинăпа Вячеслв Кузьмин турттарса тăчĕ. Кĕрхи тулăсем кăçал 630 гектар йышăнчĕç, – тет хуçалăх агрономĕ Евгений Антонов.
Тĕрĕссипе каласан, тыр-пул пухасси – ял хуçалăхĕнче яваплă та йывăр тапхăр. Механизаторсем çитмеççĕ. Юрать-ха, аслă ăрури çĕр ĕçченĕсем лару-тăрăва ăнланса пулăшма килеççĕ. Комбайн штурвалĕсем умне тĕп специалистсем – Вячеслав Сергеевпа Евгений Антонов ларнă.
Татьяна СЕМЕНКО.
Мияки районĕ, Çĕнĕ Хурамал ялĕ.