Муниципалитет тапхăрĕнчи çĕнтерÿçĕсем паллă

Асăннă проект ял çыннисем хастар пулнипе пурнăçа кĕрет. Ăмăртăва пĕчĕк ялсем те хутшăнаççĕ, пысăк кăтартусем тăваççĕ. Проект тĕрлĕ ÿсĕмри ырă кăмăллă çынсене пĕрлештернĕ май обществăна паха витĕм кÿрет. 2019 çултанпа унта 3 пин ытла ял-сала хутшăннă. Вăтăр тăхăр ял хутлăхĕ «Урă ял» ята тивĕçнĕ. Çтерлĕпуç районĕнчи Кабакуш, Айтуган тата Елимбетово ялсем иртнĕ çулсенче ятарлă парнене илнĕ пулнă, Нижний Аллагуват ялĕнче пурăнакансем иртнĕ çулхине номинацисенчен пĕринче призер ята тивĕçнĕ.
Положенипе килĕшÿллĕн конкурс икĕ тапхăрпа иртет. Пĕрремĕш муниципаллă тапхăр шайĕнче сывлăхлă пурнăç йĕркине пропагандăлас тĕлĕшпе тĕрлĕ культура тата спорт мероприятийĕсем йĕркелеççĕ. Çтерлĕпуç районĕнчи культура пайĕн ертÿçин Альфия Тайгунован сăмахĕсем тăрăх, «Урă ял» конкурса хутшăнас тĕллевпе 15 ял хутлăхĕнчен 16 заявлени килсе çитнĕ. Вĕсенчен саккăрăшĕ çеç мала тухнă. Икĕ уйăх хушши вĕсенче сывлăхлă пурнăç йĕркине сарас, ял çыннисен социаллă пурнăçне лайăхлатас тĕлĕшпе çавра сĕтелсем, культурăпа спорт мероприятийĕсем иртнĕ. Уйрăмах çак ĕçре Çтерлĕпуç ял хутлăхĕнчи Тетĕрпуç тата Ибракаево, Кундрякский ял хутлăхĕнчи Табулда ялĕсем хастарлăх кăтартнă.
Нумай пулмасть комисси конкурсăн муниципалитет тапхăрĕнчи çĕнтерÿçипе призерсене палăртнă. Район администрацийĕнче иртнĕ оперативлă канашлура ял хутлăхĕсен пуçлăхĕсене дипломсемпе сертификатсем парса хавхалантарнă. III степень дипломне тата 30 пин тенкĕлĕх сертификата Тетĕрпуç ял çыннисем (Çтерлĕпуç ял хутлăхĕн пуçлăхĕ – Ф.Т. Фаткуллин) илме тивĕçнĕ. Иккĕмĕш вырăна Табулда ялĕ (Кундрякский ял хутлăхĕн пуçлăхĕ – З.М. Ишембитова) тухнă. Вĕсем II степень дипломлă тата 50 пин тенкĕлĕх сертификатлă пулнă. Çĕнтерÿçĕ ята Ибракаево ялĕ тивĕçнĕ. Çапла Çтерлĕпуç ял хутлăх администраци пуçлăхне Ф.Т. Фаткуллина 70 пин тенкĕлĕх сертификат панă. Ибракаево ялĕнче пурăнакансем район чысне республика тапхăрĕнче хÿтĕлĕç.
Мунира АГЛИУЛЛИНА.
Çтерлĕпуç районĕ.