Хавхаланупа тунă çулпа çынсем нумай-нумай çул усă курĕç

Тĕлпулусенчен пĕринче вĕсем Ермеккейпе Суккула çыхăнтаракан транспорт артерийĕ мĕнле йĕркеленнине, çак шухăша пурнăçа кĕртме мĕн чухлĕ вăй хунине аса илчĕç.

Креппит ялĕнче пурăнакан Аркадий Мастеров ĕç-пуç мĕнрен пуçланнине мăнаçлăн каласа пачĕ: «Мансăр çак çул пулмĕччĕ», – терĕ. Асăннă истори хăюлăхпа çирĕпленнĕ шухăш чăрмавсене çĕнтерсе пĕлтерĕшлĕ пулăма çаврăннине çирĕплетет. Ĕçсем иртнĕ ĕмĕрĕн 70-мĕш çулĕсенче пуçланнă. Расим Садыков Пугачев ячĕллĕ колхоз председателĕ пулнă май Аркадий Мастеров парторг ялсене лашапа çитнине пĕрре мар курнă. Çакă ертÿçе ял çыннисен тата парторгăн пурнăçне çăмăллатакан çĕнĕ çул тăвас шухăш патне илсе çитернĕ. Янăшма ялĕ урлă выртакан çул вырăнти çынсен нушине тивĕçтермен.

Кăткăс та нумай енлĕ ĕç пуçланнă: проекта пурнăçа кĕртме пултаракан организацие шыраса тупасси, нефть отраслĕнче тата вăрман хуçалăхĕнче ĕçлекенсемпе калаçса татăласси, йывăç касмалли техникăна явăçтарса вăрман касасси. Çакна тума чылай вăй-хал кайнă. Аркадий Васильевич та пысăк та пĕлтерĕшлĕ ĕçрен айккинче тăрса юлман, нумай юр хуракан вырăнсенче шалчасем лартнă.

Çул строительствине хĕлле пуçарса яни те çав вăхăтшăн çĕнĕлĕх пулнă. Расим Канифовичпа Аркадий Васильевич çине тăнипе çул хывас ĕç ăнăçлă вĕçленнĕ. Халĕ вĕсем иртнине аса илсе тăрăшни сая кайманнине палăртаççĕ. Çак истори пысăк тĕллевлĕ проектсем кăмăл тата çирĕплĕх пур пулсан пурнăçланнине пĕлтерет.

Паянхи кун асăннă çул таврари ялсенче пурăнакансемшĕн тата илемлĕ вырăнсем урлă иртсе çÿрекенсемшĕн меллĕ транспорт çыхăнăвĕ пулса тăнă. Аркадий Васильевичпа Расим Канифович калаçăвĕнче кăткăс лару-тăрусенчен тухма пĕлни хăйĕн çимĕçне панине пĕлме пулчĕ. Вĕсем пĕр чĕлхе тупма, пĕр-пĕр ыйтăва хăйне евĕрлĕ татса пама пултарни тĕлĕнтерет те савăнтарать. Çакна та палăртса хăвармалла, вĕсене юратнă мăшăрĕсем, Маргарита Давыдовнапа Земфира Навшиевна, хавхалантарнă, палăртнине пурнăçă кĕртме пулăшнă.

Ермеккейпе Суккул хушшинчи çул инфраструктурăн ахаль объекчĕ кăна мар, хастаррăн ĕçленин символĕ пулса тăнă. Унпа çынсем тата нумай-нумай çул усă курĕç, вăл çак хастарсене аса илтерĕ.

Надежда ПОПОВА.
Ермеккей районĕ.